‘2019 मध्ये महाराष्ट्राच्या पाठीत खंजीर खुपसला, तो तर दरोडा..’; एकनाथ शिंदेंचा उद्धव ठाकरेंवर घणाघात

‘उद्या सरन्यायाधीशांच्या निवडणुकाही मागाल’

निवडणूक आयुक्तांची निवडणूक झाली पाहिजे, अशी मागणी करणाऱ्यांवर एकनाथ शिंदे यांनी टीका केली. आज निवडणूक आयुक्तांच्या निवडणुका घेण्याची मागणी केली जात आहे, उद्या सरन्यायाधीशांच्या आणि परवा महापालिका आयुक्तांच्या निवडणुकांची मागणी केली जाईल, असा टोला त्यांनी लगावला.

हे ही वाचा>> '%$#खोर, सा& माणूस.. बाथरूममध्ये जाऊन गुपचूप खातोस, तुझी औकात काय?', रामदास कदम जरांगेंवर संतापले

उद्धव ठाकरे यांच्यावर निशाणा साधताना शिंदे यांनी त्यांच्या मुख्यमंत्रिपदावरही प्रश्न उपस्थित केला. उद्धव ठाकरे हे थेट निवडणूक जिंकून मुख्यमंत्री झाले नव्हते, असा दावा करत त्यांनी महाराष्ट्राच्या पाठीत खंजीर खुपसून मुख्यमंत्री झाल्याची टीका केली.

‘2019 मधील सत्तास्थापना ही सर्वात मोठी वोट चोरी’

2019 च्या विधानसभा निवडणुकीत मतदारांनी शिवसेना-भाजप युतीला मतदान केलं होतं, मात्र त्यानंतर शिवसेनेने काँग्रेस आणि राष्ट्रवादी काँग्रेससोबत महाविकास आघाडीचं सरकार स्थापन केलं, असा संदर्भ देत शिंदे यांनी उद्धव ठाकरेंवर आरोप केले.

हे ही वाचा>> “एकनाथ शिंदेंनी भाजपकडून 500 कोटी घेऊन मला...”; मनोज जरांगेंनी थेट शिंदेंना आव्हान देत उडवून दिली खळबळ!

ही घटना म्हणजे केवळ वोट चोरी नव्हे, तर मोठा दरोडा होता, अशा शब्दांत त्यांनी आपली भूमिका मांडली. निवडणुकीनंतर सरकार स्थापन करण्यासाठी वेगळी राजकीय आघाडी केल्याचा मुद्दा उपस्थित करत त्यांनी ठाकरेंच्या नेतृत्वावर टीका केली.

‘जिंकले की EVM चांगलं, हरले की खराब?’

ईव्हीएमच्या विश्वासार्हतेवरूनही एकनाथ शिंदे यांनी विरोधकांना लक्ष्य केलं. निवडणुकीत विजय मिळतो तेव्हा ईव्हीएम चांगलं असल्याचं म्हटलं जातं आणि पराभव झाला की त्यावर प्रश्न उपस्थित केले जातात, अशी टीका त्यांनी केली.

काँग्रेसच्या बॅलेट पेपरवर निवडणुका घेण्याच्या मागणीवरूनही शिंदे यांनी पक्षाला लक्ष्य केलं. काँग्रेसने देशात दीर्घकाळ सत्ता उपभोगली आणि आता बॅलेट पेपरची मागणी करत आहे, असं ते म्हणाले. पूर्वीच्या निवडणुकांमधील बूथ कॅप्चरिंगचा उल्लेख करत त्यांनी काँग्रेसवरही आरोप केले.

महाराष्ट्रात आरोप-प्रत्यारोपांना धार

मतचोरी, ईव्हीएम आणि निवडणूक प्रक्रियेच्या मुद्द्यावरून राज्यातील राजकारण पुन्हा तापलं आहे. एकनाथ शिंदे यांनी उद्धव ठाकरे आणि काँग्रेसवर केलेल्या या टीकेमुळे सत्ताधारी आणि विरोधकांमधील संघर्ष अधिक तीव्र होण्याची शक्यता आहे. शिंदे यांच्या आरोपांना उद्धव ठाकरे आणि काँग्रेसकडून काय प्रत्युत्तर दिलं जातं, याकडे राजकीय वर्तुळाचं लक्ष लागलं आहे.