भाजपची रॅली सुरु असताना दिवंगत गणपतराव देशमुखांच्या घरावर दारुच्या बाटल्या फेकल्या, ओमराजे निंबाळकर संतापले...

सत्तेचा माज आणि संस्कृतीचा अपमान, ओमराजेंनी भाजप नेत्यांना सुनावलं 

ओमराजे निंबाळकर म्हणाले, सत्तेचा माज आणि संस्कृतीचा अपमान…महाराष्ट्राच्या राजकारणात प्रामाणिकपणा, तत्वनिष्ठता आणि आदर्श नेतृत्वाचं प्रतीक म्हणून ज्यांचं नाव घेतलं जातं, त्या स्व. गणपतराव आबा देशमुख यांच्या सांगोला येथील घरावर भाजपच्या रॅलीदरम्यान दारूच्या बाटल्या फेकण्यात आल्या. ही केवळ धक्कादायक नाही, तर महाराष्ट्राच्या संस्कृतीवर झालेली एक अमानुष चाप आहे. ही तीच भाजपा आहे का जी स्वतःला “संस्कृतीरक्षक” म्हणवते? पण त्यांच्या रॅलीतून बाहेर येतंय दारूची नशा, गुंडगिरीची भाषा आणि सत्तेचा उन्माद!

हेही वाचा : योगेश कदम म्हणाले घायवळला परवाना दिला, CM फडणवीस म्हणतात परवाना नाही दिला... नेमकं काय खरं?

पुढे बोलताना ओमराजे निंबाळकर म्हणाले, स्व. गणपतराव आबा सारख्या लोकनेत्यांच्या घरावर अशी घाणेरडी कृत्यं करून भाजपा कार्यकर्त्यांनी दाखवून दिलं आहे की सत्ता जेव्हा अहंकाराच्या नशेत चढते, तेव्हा माणुसकीचं भान हरवतं. ज्यांच्या घराचं दार बंद असतानाही आदर्शाचा सुगंध दरवळतो, त्या देशमुख कुटुंबावर झालेला हा प्रकार महाराष्ट्राच्या राजकारणातील अधःपाताचं जिवंत उदाहरण आहे. महाराष्ट्र म्हणजे संयम, आदर आणि संस्कारांची भूमी.पण सध्याचं सरकार हेच संस्कार पायदळी तुडवत आहे — ना शिष्टाचार उरलेत, ना आदर्श. ही केवळ बाटली फेकण्याची घटना नाही, तर महाराष्ट्राच्या विचारसरणीवर फेकलेली घाण आहे. दारूच्या नशेत बुडालेली ही सत्ता लोकांच्या जागृतीसमोर फार काळ टिकणार नाही. कारण महाराष्ट्राच्या संस्कृतीचा अपमान करणाऱ्यांना इतिहास कधीच माफ करत नाही.

रोहित पवारांनीही व्यक्त केला संताप 

आमदार रोहित पवार म्हणाले, सोलापूरच्या पालकमंत्र्यांच्या उपस्थितीत झालेल्या भाजपच्या पक्षप्रवेशाच्या कार्यक्रमा आधी झालेल्या रॅली मध्ये भाजपच्या कार्यकर्त्यांनी सांगोल्यातील स्व.गणपतराव देशमुख (आबा) यांच्या घरावर दारूच्या बाटल्या फेकल्या, हे अत्यंत दुर्दैवी आहे . या घटनेचा मी तीव्र शब्दात निषेध करतो. या घरात आबांच्या पत्नी व नातू विद्यमान आमदार बाबासाहेब देशमुख राहतात. सांगोल्याचे देशमुख कुटुंब हे राज्यातील एक आदर्श कुटुंब आहे. अशा भ्याड हल्ल्याने ते दबतील असे कोणाला वाटत असेल तर तो त्यांचा गैरसमज आहे. आम्ही सर्वजण याप्रसंगी देशमुख कुटुंबियाच्या सोबत आहोत.

इतर महत्त्वाच्या बातम्या

नताशासोबत घटस्फोट घेतल्यानंतर हार्दिक पंड्या आता नव्या मॉडेलच्या प्रेमात पडला, इन्स्टाग्रामवर बीचवरील फोटो शेअर