'बिश्नोईला साबरमतीतून खेचून आणून दाखवा'; उद्धव ठाकरेंचं फडणवीसांना आव्हान, शेतकरी मदतीवरूनही घेरलं

गेल्या वर्षीच्या 31 हजार कोटी रुपयांचं पॅकेजचं काय झालं? 

शेतकऱ्यांच्या प्रश्नावर बोलताना उद्धव ठाकरे यांनी अतिवृष्टीमुळे झालेलं नुकसान, दुष्काळाची शक्यता आणि मदतीच्या घोषणांवरून सरकारला धारेवर धरलं. गेल्या वर्षी अतिवृष्टीमुळे जमिनीचा वरचा थर वाहून गेला, विहिरी गाळाने भरल्या आणि शेतकऱ्यांचं मोठं नुकसान झालं. त्यावेळी मुख्यमंत्र्यांनी 31 हजार कोटी रुपयांचं पॅकेज जाहीर केलं होतं. मात्र, प्रत्यक्षात किती शेतकऱ्यांना मदत मिळाली? शेतकऱ्यांना सात रुपये आणि एक रुपयाचे धनादेश मिळाल्याचा उल्लेख करत त्यांनी मदतीच्या पद्धतीवर टीका केली. 

हेही वाचा : “एकनाथ शिंदेंनी भाजपकडून 500 कोटी घेऊन मला...”; मनोज जरांगेंनी थेट शिंदेंना आव्हान देत उडवून दिली खळबळ!

नमो किसान योजनेचे चार हजार रुपयांचे दोन हप्ते अद्याप मिळाले नाहीत. आताचे पाच हजार रुपयांची मदत म्हणजे उपकार नाही. परभणीतील झरी गावात युवराज मुधवर या 14 वर्षीय मुलाने नवीन कपडे घेता येत नसल्याने त्यांने आत्महत्या केलीये. शेतकऱ्यांच्या मुलांच्या गरजा पूर्ण करता येत नसतील, तर त्यांच्या कुटुंबांची परिस्थिती किती गंभीर असेल, याकडे ठाकरेंनी लक्ष वेधलं.

मतचोरी आणि आंदोलकांवरील पोलिसी कारवाईच्या मुद्द्यावरूनही उद्धव ठाकरे यांनी केंद्र सरकारवर टीका केली. लोकशाहीतील मतदानाचा अधिकार हिरावला जात असल्याची भावना निर्माण झाली, तर नागरिकांनी आवाज उठवायचा नाही का? जंतरमंतरवरील आंदोलनाचा संदर्भ देत ठाकरेंनी तरुण-तरुणींवर झालेल्या लाठीमाराचा आणि पोलिसांकडून झालेल्या मारहाणीचा उल्लेख केला. नीट परीक्षेचा पेपर फुटल्याच्या मुद्द्यावरून आंदोलन करणाऱ्या तरुणांच्या संतापामागे इतर आर्थिक आणि सामाजिक प्रश्नही असल्याचं ते म्हणाले. नोटबंदीमुळे व्यवसाय उद्ध्वस्त झाल्याचं एका आंदोलकाने सांगितल्याचा अनुभव त्यांनी मांडला. मतचोरीच्या मुद्द्यावरून ज्ञानेश कुमार यांच्या राजीनाम्याची मागणी करत त्यांनी सरकारवर निशाणा साधला. अन्यायाविरुद्ध आवाज उठवणं आवश्यक असल्याचं सांगत, अन्यायाविरुद्ध संताप व्यक्त न करणाऱ्यांनी छत्रपती शिवाजी महाराजांचं नाव घेऊ नये, असं उद्धव ठाकरे म्हणाले.