कथित लव्ह जिहाद प्रकरणात खासदार नवनीत राणा अडकणार?; पोलिसांनी दाखल केला गुन्हा

अमरावतीच्या खासदार नवनीत राणांनी पोलिसांशी ज्या प्रकरणावरून हुज्जत घातली, ते आता त्यांच्या अंगलट आलं आहे. नवनीत राणा यांच्याविरुद्ध अमरावतीतील राजापेठ पोलीस ठाण्यात गुन्हा दाखल करण्यात आला आहे. नवनीत राणा यांच्याविरुद्ध धमकावणे आणि बदनामी केल्याचा आरोप करण्यात आला आहे. त्यामुळे मुलाच्या बदनामी प्रकरणी गुन्हा दाखल झाल्यानं हे प्रकरण राणांवर उलटण्याची शक्यता व्यक्त केली जात आहे.

खासदार नवनीत राणा यांनी हनुमान चालीसा पठण प्रकरणानंतर लव्ह जिहाद मुद्दा उचलून धरला आहे. मात्र, त्यांनी ज्या प्रकरणात आवाज उठवला, ते बुमरँग झालं. आता याच प्रकरणामुळे नवनीत राणा यांच्या अडचणी वाढल्या आहेत.

काही दिवसांपूर्वी अमरावतीतील राजापेठ पोलीस ठाण्यात मुलगी बेपत्ता झाल्याची तक्रार करण्यात आली होती. मुलीच्या आईवडिलांनी खासदार नवनीत राणांकडे मुलीचा शोध घेण्यासंदर्भात मदत मागितली. त्यानंतर खासदार नवनीत राणांनी या प्रकरणाचा थेट लव्ह जिहादशी संबंध जोडला.