डोंबिवली : शाळेच्या ट्रस्टीच्या मुलाची शिक्षिकेला अश्लील व्हिडीओ पाठवत शरीरसुखाची मागणी; मनसेने इंगा दाखवला
Dombivli Crime News : डोंबिवलीतील सागाव येथील एका नामांकित शाळेत ट्रस्टीच्या मुलाने शिक्षिकेला अश्लील व्हिडिओ पाठवून विनयभंग केल्याचा धक्कादायक प्रकार उघडकीस आला असून पोलिसांनी आरोपीला ताब्यात घेतले आहे.
ADVERTISEMENT
बातम्या हायलाइट
डोंबिवली : शाळेच्या ट्रस्टीच्या मुलाची शिक्षिकेला अश्लील व्हिडीओ पाठवत शरीरसुखाची मागणी
मनसेने आंदोलन करत इंगा दाखवला
Dombivli Crime News : डोंबिवलीतील सागाव परिसरात असलेल्या एका नामांकित शाळेत शिक्षणाच्या पवित्र क्षेत्राला काळीमा फासणारी एक अत्यंत संतापजनक घटना समोर आली आहे. जय भारत हायस्कूलमधील एका शिक्षिकेला शाळेच्याच ट्रस्टीच्या मुलाने अश्लील व्हिडिओ आणि मेसेज पाठवून तिचा मानसिक छळ केल्याचा आरोप करण्यात आला आहे. या घटनेमुळे संपूर्ण डोंबिवली शहरात खळबळ उडाली असून, महिलांच्या सुरक्षिततेचा प्रश्न पुन्हा एकदा ऐरणीवर आला आहे. संतापजनक बाब म्हणजे, ज्या ठिकाणी मुलांच्या भविष्याची जडणघडण होते, त्याच ठिकाणी एका महिला शिक्षिकेचा विनयभंग झाल्याने पालक आणि स्थानिक नागरिकांमध्ये तीव्र संतापाची लाट उसळली आहे. पोलिसांनी या प्रकरणाची तातडीने दखल घेत आरोपीला ताब्यात घेतले असून अधिक तपास सुरू केला आहे.
मनसेचे आंदोलन करताच आरोपी अटकेत
मिळालेल्या सविस्तर माहितीनुसार, शाळेचे ट्रस्टी शिवा अय्यर यांचा मुलगा सरवना अय्यर हा गेल्या काही दिवसांपासून पीडित शिक्षिकेला वारंवार मोबाईलवर अश्लील मेसेज पाठवून त्रास देत होता. इतकेच नाही तर त्याने शिक्षिकेला अश्लील व्हिडिओ पाठवून तिच्याकडे अयोग्य शरीरसंबंधांची मागणी केल्याचा गंभीर आरोप करण्यात आला आहे. या सततच्या त्रासामुळे मानसिक दबावाखाली असलेल्या शिक्षिकेने अखेर आपल्या आईसह महाराष्ट्र नवनिर्माण सेनेच्या पदाधिकाऱ्यांकडे धाव घेऊन न्यायाची मागणी केली. मनसेचे नेते राहुल कामत, अरुण जांभळे आणि महिला पदाधिकारी कोमल पाटील यांनी कार्यकर्त्यांसह शाळेवर धडक दिली आणि आरोपीला तातडीने पोलिसांच्या स्वाधीन करण्याची मागणी केली. यावेळी शाळेत सुमारे तासभर मोठा गदारोळ आणि तणावाचे वातावरण निर्माण झाले होते, आंदोलकांनी घोषणाबाजी करत प्रशासनाचा निषेध केला.
हेही वाचा : अमरावती पोलीस आयुक्तालयात जवानानं स्वत:वर गोळीबार करत संपवलं जीवन, पोलीस दलात एकच खळबळ
पोलीस कारवाई आणि ट्रस्टीची भूमिका
घटनेचे गांभीर्य ओळखून मानपाडा पोलीस ठाण्याचे वरिष्ठ पोलीस निरीक्षक संदीपान शिंदे आपल्या फौजफाट्यासह तातडीने घटनास्थळी दाखल झाले. पोलिसांनी आंदोलकांना शांत केले आणि परिस्थितीवर नियंत्रण मिळवून शाळेत सुरक्षा व्यवस्था तैनात केली. पोलिसांनी शाळेचे ट्रस्टी शिवा अय्यर यांच्याशी संपर्क साधून त्यांच्या मुलाबाबत विचारणा केली असता, त्यांनी तपासात पूर्ण सहकार्य दर्शवले. ट्रस्टींनी स्वतः आपल्या मुलाला पोलिसांच्या स्वाधीन केले, ज्यानंतर पोलिसांनी सरवना अय्यर याला ताब्यात घेऊन पोलीस ठाण्यात नेले. पोलिसांनी या प्रकरणातील तांत्रिक पुरावे गोळा करण्यासाठी संबंधित मोबाईल आणि त्यातील चॅट्स तपासण्याचे काम सुरू केले असून, पीडित शिक्षिकेचा सविस्तर जबाब नोंदवून योग्य त्या कलमान्वये गुन्हा दाखल करण्याची प्रक्रिया राबवली जात आहे.
