13 वर्षांपूर्वी मृत घोषित केलेला आरोपी जिवंत सापडला; न्यायालयाने तुरुंगात पाठवलं

हेही वाचा : सणाच्या तोंडावर अभिनेत्रीची मोठी आर्थिक फसवणूक, सायबर भामट्यांनी बँक खाते केले रिकामे!

बनावट मृत्युपत्र तयार केल्याचा आरोप

सोमवारी गांधी नगर येथील रहिवासी ताराचंद शर्मा याने विशेष मुख्य न्यायिक दंडाधिकारी शिव नंद गुप्ता यांच्या न्यायालयात आत्मसमर्पण केलं. त्याने न्यायालयात जामीन अर्जही दाखल केला. या अर्जावर सुनावणी झाल्यानंतर न्यायालयाने त्याचा जामीन अर्ज फेटाळून लावला आणि त्याला तुरुंगात पाठवण्याचे आदेश दिले. तक्रारदाराच्या वतीने ज्येष्ठ वकील समीर भटनागर यांनी बाजू मांडली. त्यांच्या म्हणण्यानुसार, 1 सप्टेंबर 1999 रोजी फसवणुकीच्या प्रकरणात ताराचंद शर्माला न्यायालयाने समन्स बजावलं होतं. त्याच्यावर बनावट मृत्युपत्र तयार केल्याचा आरोप होता. आरोपीला उच्च न्यायालयातूनही दिलासा मिळाला नव्हता.

हेही वाचा : सणाच्या तोंडावर अभिनेत्रीची मोठी आर्थिक फसवणूक, सायबर भामट्यांनी बँक खाते केले रिकामे!

स्कूटरवरून जाताना पाहिलं आणि त्याचा फोटो काढला

वकिलांच्या म्हणण्यानुसार, 2019 मध्ये आरोपीच्या बाजूने न्यायालयात बनावट मृत्यू प्रमाणपत्र आणि मृत्यूचा अहवाल सादर करण्यात आला होता. ताराचंद शर्मा याचा मृत्यू झाल्याचं दाखवण्यासाठी हे दस्तऐवज सादर करण्यात आल्याचा आरोप आहे. हा संपूर्ण कट न्यू आग्रा पोलीस ठाण्याचे तत्कालीन स्टेशन हाऊस ऑफिसर आणि इतर पोलीस कर्मचाऱ्यांच्या संगनमताने करण्यात आल्याचा आरोपही करण्यात आला आहे. हे दस्तऐवज न्यायालयात सादर झाल्यानंतर ताराचंद शर्माविरुद्धची कार्यवाही थांबवण्यात आली होती. त्यानंतर 6 फेब्रुवारी 2026 रोजी राज कुमार वर्मा यांनी ताराचंद शर्मा याला गांधी नगर परिसरात स्कूटरवरून जाताना पाहिलं आणि त्याचा फोटो काढला.

यानंतर तक्रारदाराने फोटो आणि इतर पुरावे न्यायालयासमोर सादर केले. तक्रारदाराने 20 मार्च 2026 रोजीच्या न्यायालयीन आदेशाचाही उल्लेख केला, ज्याच्या आधारे आरोपीविरोधात अजामीनपात्र वॉरंट जारी करण्यात आलं होतं. समीर भटनागर यांच्या म्हणण्यानुसार, राज कुमार वर्मा यांनी ताराचंद शर्मा, गिरीश चंद शर्मा, न्यू आग्रा पोलीस ठाण्याचे तत्कालीन स्टेशन हाऊस ऑफिसर, संबंधित पोलीस कर्मचारी आणि इतरांविरोधात न्यायालयात अर्ज दाखल केला होता. न्यायालयाच्या आदेशानंतर 9 मार्च 2026 रोजी तत्कालीन एसएचओ आणि इतर आरोपींविरोधात गुन्हा दाखल करण्यात आला. त्यानंतर ताराचंद शर्माने सोमवारी न्यायालयात आत्मसमर्पण केलं. तक्रारदाराने सादर केलेले पुरावे आणि प्रकरणातील परिस्थिती लक्षात घेऊन न्यायालयाने त्याचा जामीन अर्ज फेटाळला आणि त्याला तुरुंगात पाठवण्याचे आदेश दिले.