अल्पवयीन मुलीवर बापाचा वारंवार अत्याचार; दोन वेळा गर्भधारणा, नवजात बाळाची विक्री

मुलीवर वडिलांनी वारंवार बलात्कार केल्याचा आरोप

पोलिसांच्या माहितीनुसार, मुलीच्या वडिलांनी तिच्यावर वारंवार बलात्कार केल्याचा आरोप आहे. त्यामुळे ती गर्भवती झाली. गर्भधारणेची माहिती तिने आपल्या आत्याला दिल्यानंतर आत्याने तिच्या वडिलांना याबाबत सांगितले. त्यानंतर वडिलांनी गर्भपाताच्या गोळ्या आणल्या. आत्याच्या मदतीने मुलीला मारहाण करण्यात आली आणि तिला औषध घेण्यास भाग पाडण्यात आले. त्यामुळे तिचा गर्भपात झाल्याचा आरोप तक्रारीत करण्यात आला आहे. यानंतरही तिच्यावर पुन्हा अनेक वेळा बलात्कार करण्यात आला. त्यानंतर 2025 मध्ये ती पुन्हा गर्भवती झाली.

सिझेरियन शस्त्रक्रियेद्वारे मुलाला जन्म दिला

मुलगी गर्भवती असल्याचे समजल्यानंतर तिच्या वडिलांनी तिला एका परिचित महिलेच्या घरी नेले. या महिलेने तिला तिथे ठेवून सुरक्षित प्रसूतीची व्यवस्था करण्याचे सांगितले. काही दिवसांनी तिने मुलीला तिच्या एका मैत्रिणीच्या घरी पाठवले. तिथे मुलगी सुमारे दोन महिने राहिली. तक्रारीनुसार, वडिलांच्या परिचित महिलेने मुलीचे खरे वय लपवले. तिला वयाने मोठी आणि विवाहित असल्याचे सांगितले. त्यानंतर तिला रायपुरमधील डांगनिया येथील वासुदेव रुग्णालयात दाखल करण्यात आले. तिथे सिझेरियन शस्त्रक्रियेद्वारे तिने मुलाला जन्म दिला. प्रसूतीनंतर डॉक्टर, मुलीचे वडील आणि या प्रकरणातील इतर संबंधित लोकांनी नवजात मुलाला कथितरित्या दुसऱ्या व्यक्तीकडे सोपवले.

मुलीकडून काही कागदपत्रांवर स्वाक्षरी करून घेण्यात आली. भीतीपोटी तिने त्या कागदपत्रांवर स्वाक्षरी केल्याचे तक्रारीत म्हटले आहे. प्रसूतीनंतर तिला सुमारे 15 दिवस वडिलांच्या परिचित महिलेच्या मैत्रिणीच्या घरी ठेवण्यात आले. त्यानंतर तिचे वडील तिला पुन्हा घरी घेऊन गेले. मुलीचे वय वाढवून तिला प्रौढ आणि विवाहित दाखवण्यासाठी आधारकार्ड बनावट केल्याचा आरोप तक्रारीत करण्यात आला आहे. या तक्रारीवरून पोलीस ठाण्यात BNS, POCSO कायदा आणि Juvenile Justice Act मधील विविध कलमांनुसार गुन्हा दाखल करण्यात आला. वरिष्ठ पोलीस अधिकाऱ्यांनी प्रकरण गांभीर्याने घेत आरोपींना अटक करण्याचे निर्देश दिले. त्यानंतर मुलीच्या वडिलांसह सहा जणांना अटक करण्यात आली असून, त्यांच्या ताब्यातून दोन मोबाईल फोन जप्त करण्यात आले आहेत. आरोपींविरुद्ध पुढील कारवाई सुरू असल्याचे पोलिसांनी सांगितले.