भावासाठी जेवण बनवलं, अन् नंतर आली मृत्यूची बातमी..., दिव्यांकासोबत काय घडलं?
Divyanka Sirohi Death News : प्रसिद्ध अभिनेत्री दिव्यांका सिरोही हिचा वयाच्या 30 व्या वर्षी संशयास्पद मृत्यू झाला असून, गाझियाबाद येथील राहत्या घरी ती मृतावस्थेत आढळली. इंस्टाग्रामवर 13 लाखांहून अधिक फॉलोअर्स असलेल्या या अभिनेत्रीच्या अकाली निधनाने कलाविश्वात शोककळा पसरली आहे.
ADVERTISEMENT
बातम्या हायलाइट
भावासाठी जेवण बनवलं, अन् नंतर आली मृत्यूची बातमी
..., दिव्यांकासोबत काय घडलं?
Divyanka Sirohi Death News : म्युझिक इंडस्ट्रीमधील एक लोकप्रिय चेहरा आणि सोशल मीडिया स्टार दिव्यांका सिरोही हिचा अवघ्या 30 व्या वर्षी संशयास्पद परिस्थितीत मृत्यू झाला आहे. मंगळवारी (दि.21) उशिरा रात्री गाझियाबादच्या राजनगर एक्सटेंशन येथील तिच्या घरी ही हृदयद्रावक घटना घडली. प्राथमिक माहितीनुसार, अचानक प्रकृती बिघडल्याने आणि चक्कर आल्यामुळे दिव्यांका जमिनीवर कोसळली, ज्यामुळे तिच्या डोक्याला गंभीर दुखापत झाली आणि तिचा जीव गेला. मृत्यूच्या काही वेळ आधीपर्यंत दिव्यांका पूर्णपणे सामान्य होती, तिने आपल्या भावासाठी जेवणही बनवले होते. जेव्हा तिचा भाऊ कामासाठी बाहेर गेला, तेव्हा तिने त्याला 'ओके' असा संदेश पाठवून घराचे दरवाजे बंद करून घेण्याबाबत आश्वस्त केले होते, मात्र काही वेळाने कुटुंबीय परतले तेव्हा त्यांना दिव्यांकाचा निर्जीव आणि ताठरलेला मृतदेह आढळून आला.
स्टारडमचा प्रवास आणि सोशल मीडियावरील जबरदस्त क्रेझ
दिव्यांका आपल्या कुटुंबाच्या अत्यंत जवळ होती. अभिनयाच्या क्षेत्रात येण्यापूर्वी तिने काही काळ नोकरीही केली होती, परंतु स्वतःच्या मेहनतीने तिने अल्पावधीतच हरियाणाच्या सिनेक्षेत्रात वेगळी ओळख निर्माण केली. सोशल मीडियावर तिची प्रचंड लोकप्रियता होती आणि इन्स्टाग्रामवर तिचे 13 लाखांहून अधिक फॉलोअर्स होते. सुनंदा शर्माच्या "मेरी मम्मी नू पसंद नी तू" या गाण्यावरील तिच्या व्हिडिओने तिला रातोरात प्रसिद्धी मिळवून दिली होती. चाहत्यांमध्ये तिची साधी राहणी आणि व्हिडिओ बनवण्याची अनोखी शैली नेहमीच चर्चेचा विषय असायची. तिच्या अशा अचानक जाण्याने तिच्या लाखो चाहत्यांना मोठा धक्का बसला आहे.
50 हून अधिक गाणी आणि दिग्गज कलाकारांसोबत काम
दिव्यांकाने आपल्या कारकिर्दीत 50 पेक्षा जास्त हरियाणाच्या गाण्यांमध्ये काम केले होते. तिने मासूम शर्मा, अमित सैनी रोहतकिया आणि केडी यांसारख्या उद्योगातील दिग्गज कलाकारांसोबत स्क्रीन शेअर केली होती. सिरसा येथील जेसीडी कॉलेजमध्ये मासूम शर्मासोबत झालेल्या तिच्या लाईव्ह शोने तिच्या लोकप्रियतेत मोठी भर घातली होती, ज्यामुळे ती घराघरात पोहोचली होती. मात्र, या यशाच्या शिखरावर असतानाच तिची प्राणज्योत मालवली. दिव्यांकाच्या निधनाचे नेमके कारण अद्याप स्पष्ट झालेले नाही. सुरुवातीला हा 'हार्ट अटॅक' असावा अशी शक्यता वर्तवली जात असली तरी, तिच्या शरीरावरील सूज आणि डोक्याला लागलेली जखम यामुळे अनेक प्रश्न उपस्थित होत असून तपास अद्याप सुरू आहे.
कलाविश्वातून श्रद्धांजली आणि अंतिम निरोप
