जळगाव : 10 हजारांची लाच, घरात अडीच किलो सोनं; ZP अधिकाऱ्याच्या घरात मोठं घबाड सापडलं

रस्त्याच्या कामाचे बिल मंजूर करण्यासाठी लाच मागितल्याचा आरोप 

मिळालेल्या माहितीनुसार, रस्त्याच्या कामाचे 10 लाख रुपयांचे बिल मंजूर करण्याच्या मोबदल्यात शिसोदे यांनी 10 हजार रुपयांची लाच मागितल्याचा आरोप आहे. त्यानुसार एसीबीने त्यांच्याविरोधात कारवाई केली. त्यांना लाच स्वीकारताना पकडल्यानंतर त्यांच्या मालमत्तेची तपासणी करण्यात आली. जळगावमधील आदर्श नगर परिसरात असलेल्या त्यांच्या दोन घरांची झडती घेण्यात आली. याशिवाय त्यांच्या बँकेतील लॉकरचीही तपासणी करण्यात आली. या संपूर्ण झडतीमध्ये 5 कोटी 16 लाख 88 हजार 389 रुपयांची मालमत्ता आढळून आली. त्यांच्या घरातून 7 लाख 97 हजार रुपयांची रोकड जप्त करण्यात आली आहे. या कारवाईमुळे जळगाव जिल्ह्यात चर्चेला सुरुवात झाली आहे.

बँकेच्या लॉकरमध्ये आढळलेले दागिने

या तपासात सर्वाधिक लक्ष वेधून घेणारी बाब म्हणजे बँकेच्या लॉकरमध्ये आढळलेले दागिने. शिसोदे यांच्या लॉकरमध्ये सुमारे 3 कोटी 74 लाख रुपये किमतीचे सोने, चांदी आणि प्लॅटिनमचे दागिने आढळले आहेत. यामध्ये 2 हजार 524 ग्रॅम सोने, 11 हजार 633 ग्रॅम चांदी आणि 101 ग्रॅम प्लॅटिनमच्या दागिन्यांचा समावेश आहे. म्हणजेच लॉकरमध्ये अडीच किलोहून अधिक सोने आणि साडेअकरा किलोहून अधिक चांदी आढळली आहे. या दागिन्यांची किंमत कोट्यवधी रुपयांच्या घरात आहे. बँकेच्या लॉकरची झडती रात्री उशिरापर्यंत सुरू होती. घरातील रोकड आणि लॉकरमधील दागिने यामुळे शिसोदे यांच्या मालमत्तेचा मोठा तपशील तपास यंत्रणेसमोर आला आहे.

दरम्यान, एवढ्या मोठ्या प्रमाणात आढळलेली मालमत्ता नेमकी कोणत्या स्रोतांतून जमा करण्यात आली, याची आता एसीबीकडून पडताळणी केली जाणार आहे. ही मालमत्ता शिसोदे यांच्या ज्ञात उत्पन्नाशी जुळते का, तसेच या आर्थिक व्यवहारांमागे आणखी काही बाबी आहेत का, याचाही तपास केला जाणार आहे. एका बाजूला 10 हजार रुपयांची लाच मागितल्याचा आरोप आणि दुसऱ्या बाजूला घर आणि बँक लॉकरमध्ये आढळलेली 5 कोटी 16 लाख रुपयांहून अधिकची मालमत्ता, यामुळे या प्रकरणाकडे लक्ष लागले आहे. एसीबीच्या पुढील तपासातून मालमत्तेच्या स्रोतांबाबत आणि आर्थिक व्यवहारांबाबत कोणती माहिती समोर येते, हे पाहणे महत्त्वाचे ठरणार आहे.