नौदल अधिकाऱ्याचे अनैतिक संबंध, दिवसभर वेळ घालवला, अन् संध्याकाळी मोनिकाच्या शरीराचे तुकडे करुन फ्रिजमध्ये भरले!

मिळालेल्या माहितीनुसार, आरोपी रवींद्र हा विवाहित होता, मात्र त्याचे विशाखापट्टणममध्ये राहणाऱ्या मोनिका नावाच्या महिलेशी प्रेमसंबंध जुळले होते. रवींद्रची पत्नी काही आठवड्यांपूर्वी विझियानगरम येथील तिच्या गावी गेली होती, त्यामुळे तो घरात एकटाच होता. हीच संधी साधून त्याने रविवारी म्हणजेच 29 मार्च रोजी दुपारी मोनिकाला फोन करून आपल्या घरी बोलावून घेतले. दोघेही बराच वेळ घरात एकत्र होते, मात्र संध्याकाळच्या सुमारास त्यांच्यात कोणत्या तरी कारणावरून जोरदार वाद झाला. हा वाद इतका विकोपाला गेला की, रागाच्या भरात रवींद्रने मोनिकावर चाकूने वार करून तिची हत्या केली. या हत्येनंतर त्याने जे कृत्य केले ते ऐकून कोणाचेही काळीज थरथरेल.

मृतदेहाचे तुकडे करून काही भाग फ्रीजमध्ये लपवले

मोनिकाचा खून केल्यानंतर आरोपीने तिच्या मृतदेहाची विल्हेवाट लावण्याचे ठरवले. त्याने मृतदेहाचे अनेक तुकडे केले आणि त्यातील काही भाग पिशवीत भरून एका निर्जन ठिकाणी नेऊन नष्ट केले. धक्कादायक बाब म्हणजे, मृतदेहाचे उर्वरित काही तुकडे त्याने आपल्या घरातील फ्रीजमध्ये लपवून ठेवले होते. इतका मोठा गुन्हा केल्यानंतर आरोपी रवींद्र स्वतःहून पोलीस ठाण्यात हजर झाला आणि त्याने आपल्या गुन्ह्याची कबुली दिली. पोलिसांनी तातडीने त्याच्या घरी धाव घेऊन शोधमोहीम राबवली असता, त्यांना घराच्या झडतीदरम्यान फ्रीजमध्ये आणि इतर ठिकाणी मृतदेहाचे काही अवशेष सापडले. या घटनेमुळे पोलीस प्रशासनही हादरून गेले असून आरोपीने अत्यंत थंड डोक्याने या हत्येचा कट अंमलात आणल्याचे प्राथमिक तपासात दिसत आहे.

या प्रकरणाचा तपास करत असताना पोलिसांना मोनिकाचे शीर अद्याप सापडलेले नाही. आरोपी रवींद्रने तिचे शीर कापून इतरत्र कुठे तरी फेकून दिले असावे, असा पोलिसांना संशय आहे. बेपत्ता असलेले शीर आणि शरीराचे इतर उर्वरित भाग शोधण्यासाठी पोलिसांनी आता एक विशेष पथक तयार केले आहे. या पथकाद्वारे परिसरातील निर्जन स्थळांची आणि आरोपीने सांगितलेल्या ठिकाणांची कसून तपासणी केली जात आहे. एक सुशिक्षित आणि जबाबदार पदावर असलेल्या नौदल कर्मचाऱ्याने अशा प्रकारे क्रूरतेचा कळस गाठल्याने सर्वत्र आश्चर्य व्यक्त केले जात असून, गाजूवाका पोलीस या प्रकरणाचा अधिक सखोल तपास करत आहेत.