सांगली : केतनराज अ‍ॅकॅडमीत 3 अल्पवयीन मुलींवर अत्याचार, संस्थापकाला अटक

Sangli Crime News : सांगली जिल्ह्यातील वाळवा तालुक्यातील गोटखिंडी येथील 'केतनराज स्पर्धा परीक्षा अॅकॅडमी'मध्ये निवासी शिक्षण घेणाऱ्या तीन अल्पवयीन विद्यार्थिनींवर लैंगिक अत्याचार आणि विनयभंग झाल्याचा अतिशय धक्कादायक प्रकार उघडकीस आला आहे. याप्रकरणी अकॅडमीचा संस्थापक काशीनाथ रामचंद्र नांगरे आणि त्याला साथ देत मुलींना धमकावणारी त्याची पत्नी मनीषा काशीनाथ नांगरे (दोघेही रा. गोटखिंडी, ता. वाळवा) यांच्याविरोधात आष्टा पोलीस ठाण्यात पोक्सोसह विविध गंभीर कायद्यांन्वये गुन्हा दाखल करण्यात आला आहे. या प्रकरणातील संशयित आरोपी आणि अकॅडमीचा संचालक काशीनाथ रामचंद्र नांगरे याला आष्टा पोलिसांनी अटक केली आहे. अकॅडमीमध्ये निवासी शिक्षणासाठी राहणाऱ्या कोल्हापूर आणि सांगली जिल्ह्यातील तीन अल्पवयीन मुली या घटनेतील पीडित असून, त्यांच्या तक्रारीनंतर हा गंभीर प्रकार समोर आला आहे.