अनैतिक संबंधात अडथळा, आईने प्रियकराच्या मदतीने 2 वर्षीय चिमुरडीला संपवलं

मुलीचा मृतदेह गावाबाहेर असलेल्या नाल्याजवळ पुरला

मिळालेल्या माहितीनुसार, मेडक जिल्ह्यातील शिवरामपेट मंडळातील शेबाशपल्ली गावात ही घटना घडली. ममता आणि तिचा प्रियकर फैयाज यांचे संबंध होते. मात्र, दोन वर्षांची मुलगी त्यांच्या संबंधांत अडथळा ठरत असल्याने दोघांनी मिळून तिची हत्या केल्याचे पोलिसांनी सांगितले. हत्येनंतर दोघांनी मुलीचा मृतदेह गावाबाहेर असलेल्या नाल्याजवळ पुरला. या घटनेमुळे परिसरात खळबळ उडाली आहे.

हेही वाचा : "मला ज्ञानेश कुमारांचे मेसेज येतात..", राहुल गांधी पत्रकार परिषदेत आक्रमक; निर्वाणीचा इशारा

या प्रकरणाचा उलगडा ममताच्या वडिलांनी पोलिसांत तक्रार दाखल केल्यानंतर झाला. तक्रार मिळाल्यानंतर पोलिसांनी तपास सुरू केला आणि आरोपींचा शोध घेण्यासाठी धागेदोरे गोळा केले. तपासादरम्यान ममता आणि फैयाज हे आंध्र प्रदेशातील नरसरापेट येथे असल्याची माहिती पोलिसांना मिळाली. त्यानंतर पोलिसांनी दोघांना तेथून ताब्यात घेतले आणि पुढील चौकशीसाठी मेडक येथे आणले. चौकशीदरम्यान ममता आणि फैयाज यांनी गुन्ह्याची कबुली दिल्याचे पोलिसांनी सांगितले. त्यानंतर पोलिस अधिकाऱ्यांच्या उपस्थितीत मुलीचा मृतदेह पुरलेल्या ठिकाणाहून बाहेर काढण्यात आला. मृतदेह शवविच्छेदनासाठी पाठवण्यात आला. मृतदेहाची अवस्था बरीच खराब झाली होती, अशी माहिती अधिकाऱ्यांनी दिली.

या प्रकरणाचा तपास अद्याप सुरू असून, पोलिस सर्व बाजूंनी तपास करत आहेत. मुलीची हत्या नेमकी कोणत्या परिस्थितीत झाली आणि या प्रकरणाशी संबंधित इतर बाबी काय आहेत, याचा शोध घेतला जात आहे. ममताच्या वडिलांनी दिलेल्या तक्रारीनंतर या प्रकरणातील आरोपींचा शोध घेऊन त्यांना अटक करण्यात आली. दरम्यान, दोन वर्षांच्या मुलीच्या हत्येच्या या घटनेमुळे गावात शोक आणि संतापाचे वातावरण आहे. पोलिसांकडून पुढील तपास सुरू आहे.