आर्यनवर ड्रग्ज सेवन केल्याचा गुन्हा, पण NCB ने मेडीकल टेस्ट केलीच नाही - वकीलांची कोर्टात माहिती

जाणून घ्या कोर्टात नेमकं घडलं तरी काय? NCB ने काय दिलं स्पष्टीकरण...
आर्यनवर ड्रग्ज सेवन केल्याचा गुन्हा, पण NCB ने मेडीकल टेस्ट केलीच नाही - वकीलांची कोर्टात माहिती

ड्रग्ज पार्टी प्रकरणात NCB तर्फे अटकेची कारवाई करण्यात आलेला अभिनेता शाहरुख खानचा मुलगा आर्यनबद्दल आता महत्वाची माहिती समोर येते आहे. आर्यन खानला न्यायालयानी कोठडी सुनावण्यात आल्यामुळे तो सध्या आर्थर रोड जेलमध्ये आहे. NCB ने आर्यन खानवर अमली पदार्थ सेवन केल्याप्रकरणी गुन्हा दाखल केला असला, तरीही त्याची मेडीकल टेस्ट NCB ने केली नाही.

ड्रग्ज पार्टीत पकडलेल्या आरोपींचं नियमानुसार रक्त आणि लघवी तपासली जाते. परंतू NCB ने आर्यन खानची मेडीकल टेस्ट केलीच नसल्याची माहिती त्याचे वकील सतीश मानेशिंदे यांनी कोर्टात दिली.

इतकच नव्हे तर आर्यनने स्वतःहून NCB अधिकाऱ्यांना आपली मेडीकल चाचणी घेण्याची तयारी दाखवली होती, परंतू NCB ने त्याची चाचणी केलीच नसल्याचं मानेशिंदेंनी सांगितलं. आर्यन खान, अरबाज मर्चंट यांच्यासह काही आरोपींना NCB ने २ ऑक्टोबरच्या रात्री ताब्यात घेऊन अटक केली होती. NCB ने दिलेल्या माहितीनुसार, Cordelia या अलिशान क्रुझवर या पार्टीचं आयोजन करण्यात आलं होतं. बहुतांश वेळा अशा प्रकारच्या रेव्ह पार्टी या समुद्रकिनारी आयोजित केल्या जातात. परंतू ही रेव्ह पार्टी दोन ऑक्टोबरला क्रुझवर आयोजित करण्यात आली होती.

आर्यनवर ड्रग्ज सेवन केल्याचा गुन्हा, पण NCB ने मेडीकल टेस्ट केलीच नाही - वकीलांची कोर्टात माहिती
'NCB ने राष्ट्रवादीच्या बड्या नेत्याच्या मुलाशी चांगले संबंध असलेल्या व्यक्तीला सोडून दिलं'

पंचनाम्यानुसार, २ ऑक्टोबरला रात्री साडेअकरा वाजता NCB चे विभागीय संचालक समीर वानखेडे यांच्या पथकाने क्रुझवर धाड टाकली. Cordelia क्रुझवरील काही प्रवाशांकडे ड्रग्ज असल्याची माहिती NCB च्या अधिकाऱ्यांकडे होती. त्यामुळे NCB कडे ज्या व्यक्तींबद्दल माहिती होती त्यापैकी काही व्यक्तींची नावं तिकडे सांगण्यात आली. काही प्रवाशांची चौकशी केल्यानंतर NCB चे अधिकारी आर्यन आणि अरबाजच्या समोरासमोर आले. NCB ला आर्यनकडे कोणतेही अमली पदार्थ सापडले नाहीत परंतू अरबाजने NCB ला आपल्या शुजमध्ये चरस असल्याचं सांगितलं. अरबाजने आपल्याजवळ असलेलं चरस हे स्वतःहून NCB अधिकाऱ्यांच्या ताब्यात दिल्याची पंचनाम्यात नोंद आहे.

NCB च्या अधिकाऱ्यांनी अरबाजकडे असलेला पदार्थ चाखून पाहिला आणि ती गोष्ट चरस असल्याचं स्पष्ट केलं. "अरबाज मर्चंटने आपल्याकडे चरस असल्याचं सांगत आर्यन खान आणि आपण क्रुझमध्ये पार्टीसाठी आल्याचं कबुल केलं. आपल्या ताब्यात असलेलं चरस हे आपण पार्टीसाठी आणि क्रुझ समुद्रात आल्यावर सेवन करणार असल्याचं अरबाजने कबुल केलं", ही नोंद पंचनाम्यात आहे.

यानंतर NCB अधिकाऱ्याने आर्यन खानचा फोन ताब्यात घेऊन त्याचे What's App चॅट तपासले. कोर्टात आर्यन खानच्या जामीनाला विरोध करताना NCB ने आर्यन हा आधीपासून ड्रग्ज घेत असल्याचं सांगितलं. आर्यन आणि अरबाजला NCB ने Narcotic Drugs and Psychotropic Substances Act च्या २७ व्या कलमाअंतर्गत अटक केली.

NCB ने आर्यन खानची मेडीकल टेस्ट न केल्याबद्दल अनेक तज्ज्ञ व्यक्तींनी आश्चर्य व्यक्त केलं आहे. २०१२ साली मुंबई पोलिसांनी जुहू येथे अशाच प्रकारे एक ड्रग्जच्या पार्टीवर छापे मारले होते. या छापेमारीत अनेक सेलिब्रेटी आणि क्रिकेटर्सना अटक करण्यात आली होती. यावेळी ताब्यात घेतलेल्या प्रत्येक व्यक्तीची ब्लड आणि युरिन टेस्ट करण्यात आली होती. या टेस्टचा रिपोर्ट आल्यानंतर ९९ टक्के लोकांनी ड्रग्ज घेतल्याचं निष्पन्न झालं होतं, यानुसारच नंतर कारवाई करण्यात आली होती. ज्यांचे मेडीकल रिपोर्ट निगेटीव्ह आले त्यांना पोलिसांनी सोडून दिलं.

मग अशा परिस्थितीत NCB ने आर्यन खानची मेडीकल चाचणी का केली नाही असा प्रश्न पडतो. काही तज्ज्ञ व्यक्तींच्या मते, आर्यन खानची मेडीकल टेस्ट निगेटीव्ह आली असती तर NCB ला आर्यनला सोडून द्यावं लागलं असतं. याउलट NCB मधील जाणकारांनी दिलेल्या माहितीनुसार, धाडसत्राच्या वेळी पार्टीला अद्याप सुरुवात झालेली नव्हती त्यामुळे आर्यनने ड्रग्ज घेण्याचा प्रश्नच येत नव्हता. याचसाठी त्याची मेडीकल टेस्ट करण्यात आली नाही. याव्यतिरीक्त NCB अधिकाऱ्यांनी याविषयी बोलण्यास नकार दिला.

Related Stories

No stories found.