फडणवीसांकडून काउंटडाऊन.. नव्या वर्षाच्या पहिल्याच दिवशी कोणाला दिला इशारा?

काय आहे देवेंद्र फडणवीस यांनी पोस्ट केलेला व्हीडिओ?

देवेंद्र फडणवीस यांनी व्हीडिओमध्ये 10 टू 1 असा एक काऊंटडाऊन दिला आहे. या प्रत्येक काऊंटडाऊनच्या मध्ये देवेंद्र फडणवीस बोलत असताना, ते संवाद साधत असताना, आशीर्वाद घेत असतानाची दृश्यं आहेत. छत्रपती शिवरायांच्या पुतळ्यालाही ते अभिवादन करताना दिसत आहेत. पंकजा मुंडेंसोबतही दिसत आहेत आणि पंतप्रधान नरेंद्र मोदींसोबतही दिसत आहेत. ही सगळी दृश्य आणि अत्यंत वेचक आणि वेधक पद्धतीने या काही सेकंदांच्या काऊंटडाऊंमध्ये पेरण्यात आली आहेत. त्यामुळे देवेंद्र फडणवीस यांनी या व्हीडिओतून कुणाला सूचक इशारा दिला आहे अशी चर्चा आता रंगली आहे.

View this post on Instagram

A post shared by Devendra Fadnavis (@devendra_fadnavis)

2019 मध्ये महाराष्ट्रात सत्तानाट्याचे 36 दिवस चाललेले प्रयोग, त्यानंतर नवं सरकार येण्याआधी देवेंद्र फडणवीस आणि अजित पवारांचा झालेला पहाटेचा शपथविधी. या सगळ्या गोष्टी महाराष्ट्र विसरलेला नाही. तसंच महाविकास आघाडी सरकारचा प्रयोगही महाराष्ट्र विसरलेला नाही. भाजपला सत्तेपासून दूर ठेवण्यासाठी एकमेकांचे कट्टर विरोधक असलेले आणि वेगळ्या विचारधारा असलेले काँग्रेस आणि शिवसेना हे पक्ष एकत्र आले. काँग्रेस, राष्ट्रवादी काँग्रेस आणि शिवसेना यांनी एकत्र येत महाविकास आघाडी स्थापन केली.

हिवाळी अधिवेशन: ‘मी महाराष्ट्राच्या इतिहासात एवढं भित्रं सरकार पाहिलेलं नाही’, फडणवीसांची तुफान टोलेबाजी

उद्धव ठाकरे हे या सरकारमध्ये मुख्यमंत्री आहेत. अशात या सरकारला दोन वर्षे पूर्ण झाल्यानंतर देवेंद्र फडणवीस यांनी जो व्हीडिओ काऊंटडाऊन पोस्ट केला आहे तो चर्चेचा विषय ठरतो आहे. 2019 ची विधानसभा निवडणूक भाजप, शिवसेना आणि त्यांचे मित्र पक्ष यांनी महायुती म्हणून लढवली होती. मात्र निकाल लागल्यानंतर सगळंच चित्र बदललं. मुख्यमंत्रीपद समसमान वाटून घेण्यावरून या दोघांमध्ये इतकं अंतर पडलं की शिवसेना सत्तेत आली आणि भाजप विरोधात बसला. 105 आमदार येऊनही भाजपला विरोधात बसावं लागलं. त्यानंतर भाजपकडून अनेकदा सरकार पडेल, लवकरच कोसळेल, अंतर्विरोधातून कोसळेल असं सांगण्यात आलं. तरीही ते काही झालं नाही. आता नव्या वर्षाच्या पहिल्याच दिवशी देवेंद्र फडणवीस यांनी शुभेच्छा देताना पोस्ट केलेला काऊंटडाऊन मात्र सूचक ठरतो आहे.