डोंबिवली: भाजपच्या कार्यकर्त्यावर प्राणघातक हल्ला, घटना CCTV मध्ये कैद

या मारहाणीत गंभीर जखमी झालेल्या मनोजला डोंबिवलीतील शास्त्रीनगर रुग्णालयात दाखल करण्यात आलं आहे. दरम्यान, ही संपूर्ण घटना सीसीटीव्हीत कैद झाली आहे. त्याच्यावर पालिकेच्या शास्त्रीनगर हॉस्पिटलमध्ये उपचार सुरू आहे. तर सदर घटनेची माहिती मिळताच आमदार रवींद्र चव्हाण यासह भाजपचे पदाधिकारी आणि कार्यकर्ते रुग्णालयात जमा झाले होते.

याप्रकरणी डोंबिवलीचे आमदार रवींद्र चव्हाण यांनी जखमींची भेट घेतली यानंतर त्यांनी हल्लेखोरांना चोवीस तासाच्या आत अटक करा अन्यथा भाजपाकडून तीव्र भूमिका घेतली जाईल असा इशारा दिला आहे.

भाजपा कार्यकर्ते मनोज कटके आपल्या स्पेअर पार्टच्या दुकानात असताना चारचाकी गाडीतून आलेल्या दोघांनी त्यांच्या डोळ्यात मिरची पूड फेकत त्यांना बेदम मारहाण करत जखमी केले. दरम्यान, मनोज यांच्यावर हल्ला कोणी आणि का केला याची माहिती नसली तरी हल्लेखोरांनी वापरलेली गाडी सीसीटीव्हीत कैद झाली असून पोलिसांना हल्लेखोराने पर्यंत पोहोचणे शक्य आहे. यामुळेच पोलिसांनी तातडीने हल्लेखोरांना अटक करावे अन्यथा भाजप आपल्या पद्धतीने याची दखल घेईल. असंही आमदार चव्हाण म्हणाले.

आमदार चव्हाण पुढे म्हणाले की, ‘भाजप कार्यकर्त्यावर झालेल्या भ्याड हल्ल्याचा आम्ही निषेध करतो. पोलिसांनी लवकरात हल्लेखोरांना अटक करावी. अशी भाजपची मागणी आहे.

याप्रकरणी कल्याण पोलीस उपायुक्त सचिन गुंजाळ यांना विचारले असता हल्लेखोरांना लवकरात लवकर अटक केली जाईल असे त्यांनी सांगितले.

मिळालेल्या माहितीनुसार, मनोज कटके असे हल्ल्यात जखमी झालेल्या भाजप कार्यकर्त्यांचे नाव आहे. त्याच्यावर कोणी हल्ला केला आणि हल्ल्यामागील नेमके काय कारण आहे हे अद्याप स्पष्ट झालेलं नाही. तर घटनेची माहिती मिळताच पोलीस रुग्णालयात दाखल झाले.

Shivsena Foundation day : पुन्हा राडा! वैभव नाईक यांच्या एका घोषणेवरून भाजप-सेना कार्यकर्ते भिडले

भाजप कार्यकर्त्यांवर झालेल्या हल्ल्याची वार्ता समजताच रुग्णालयात भाजप कार्यकर्त्यांनी प्रचंड गर्दी केली होती. आमदार चव्हाण यांनी कटके यांच्या प्रकृतीबाबत डॉक्टरांकडे माहिती घेतली. कटके यांची प्रकृती सध्या स्थिर असल्याचं समजतं आहे.