मुंबई: कारमधून 35 लाख रुपये चोरले अन् गुजरातला पळाला, मास्टरमाइंडला अहमदाबादमधून अटक
mastermind arrested in ahmedabad for stealing rs 35 lakh from a car in mumbai

मुंबई: कारमधून 35 लाख रुपये चोरले अन् गुजरातला पळाला, मास्टरमाइंडला अहमदाबादमधून अटक

Mumbai Crime: मुंबईतून लाखो रुपये चोरुन गुजरातमध्ये पळून गेलेल्या आरोपीला मुंबई पोलिसांनी मोठ्या शिताफिने अटक केली आहे.

शिवशंकर तिवारी, मुंबई: मुंबईतील समता नगर पोलीस ठाण्याच्या हद्दीत व्यापाऱ्याच्या गाडीतून 35 लाखांचा ऐवज लुटल्याप्रकरणी दिंडोशी पोलिसांनी एका आरोपीला अटक केली आहे. अहमदाबादमधील उंजा गावात महिसाणा रोड येथून त्याला अटक करण्यात आली असून त्याच्याकडून 11 लाखांचा मुद्देमाल जप्त करण्यात आला आहे.

मिळालेल्या माहितीनुसार, हे सर्व आरोपी अहमदाबादहून मुंबईला दुचाकीने यायचे आणि दरोडा टाकून परत अहमदाबादला पळायचे. अटक करण्यात आलेला आरोपी हा मूळचा दिल्लीतील रहिवासी आहे. या घटनेसाठी दिल्लीहून अहमदाबादला पाचारण करण्यात आलेला हा मास्टरमाईंड आहे. टोळीतील अन्य 5 साथीदार फरार आहेत.

पोलीस डीसीपी सोमनाथ घार्गे यांना मिळालेल्या माहितीनुसार, हे आरोपी अहमदाबादहून मुंबईत येण्यापूर्वी रेकी करायचे. त्यानंतर लूटमार करून ते अहमदाबादला पळून जायचे.

काही दिवसांपूर्वी समता नगर येथील दरोड्याच्या घटनेत ही टोळी मुंबईत आली होती. मालाड डायमंड मार्केटमध्ये 2 जण रेकी करत होते. फिर्यादी सुनील गुजर यांनी पैशांनी भरलेली बॅग त्यांच्या पांढऱ्या रंगाच्या फॉर्च्युनर कारमध्ये ठेवताच आरोपींनी या कारचा पाठलाग सुरु केला.

काही अंतरावर गेल्यावर कारच्या पुढे एक बाइक टाकून अपघात झाल्याचे सांगत सुनील गुजर यांना कारमधून बाहेर काढले. काही जणांनी सुनील यांच्याशी हुज्जत घातली. यावेळी इतर आरोपींनी गाडीची काच फोडून मागच्या सीटवर ठेवलेली 35 लाख रुपयांची बॅग घेऊन पळ काढला.

या घटनेची माहिती मिळताच समता नगर पोलीस ठाण्याचे अतिरिक्त पोलीस आयुक्त प्रवीण पडवळ यांच्यासह डीसीपी पथकाचे पथक घटनास्थळी पोहोचले व त्यांनी घटनास्थळी बसवलेले सीसीटीव्ही फुटेज आणि घटनेपूर्वीचे सीसीटीव्ही फुटेज तपासले.

ज्यामध्ये पोलिसांनी 25 हून अधिक ठिकाणचे फुटेज तपासले. तपासात असे आढळून आले आहे की, ही टोळी अहमदाबादमधील छारा नगर येथून दुचाकीने आणि खासगी बसने मुंबईत येत असे. मुंबईत सलग 2 ते 3 घटना घडवून ते पळून जायचे.

पैसे लुटल्यानंतर ही टोळी जुगार खेळत असल्याचं यावेळी समोर आलं आहे. ही टोळी घटनेच्या वेळी शस्त्रेही सोबत ठेवायची. तसेच गरज पडल्यास दरोड्याच्या वेळी ते याचा वापरही करत असल्याचं पोलिसांना सांगितलं.

सध्या दिंडोशी पोलिसांनी आरोपी पंकज मिश्रा (वय 34 वर्ष) याला अहमदाबाद येथून अटक केली आहे. या घटनेसाठी खास दिल्लीहून आला होता. या घटनेनंतर पंकज दिल्लीला पळून जाण्याच्या प्रयत्नात होता, मात्र त्यापूर्वीच दिंडोशी पोलीस ठाण्याचे एपीआय चंद्रकांत घार्गे आणि पोलीस उपनिरीक्षक योगेश कान्हेकर व पथकाने 4 दिवसांच्या अथक परिश्रमानंतर त्याच्या मुसक्या आवळल्या.

mastermind arrested in ahmedabad for stealing rs 35 lakh from a car in mumbai
पुण्यात मैत्रिणीला गिफ्ट देण्यासाठी ज्वेलर्समध्ये चोरी, मेडिकलच्या दोन विद्यार्थ्यांना अटक

अटकेनंतर दिंडोशी पोलिसांनी आता त्याला समता नगर पोलिसांच्या ताब्यात दिले आहे. 35 लाख लूटमार प्रकरणी समता नगर पोलीस सध्या तपास करत आहेत.

Related Stories

No stories found.
Mumbai Tak
www.mumbaitak.in