सातारा: ‘ओ शेsssठ.. तुम्ही नादच केलाय थेट’, शशिकांत शिंदेंच्या पराभवानंतर राष्ट्रवादीच्याच नेत्याचा जबरा डान्स

शशिकांत शिंदे यांचा पराभव झाल्यानंतर राष्ट्रवादीचे वसंतराव मानकुमरे यांनी आपला आनंद अजिबात न लपवता थेट डीजे लावून त्यावरच डान्स सुरु केला. सातारा जिल्हा बँकेची निवडणूक जाही झाल्यापासून निकाल लागेपर्यंत राष्ट्रवादीचे नेते वसंतराव मानकुमरे यांनी शशिकांत शिंदे यांच्या विरोधात सर्व फासे आवळले होते.

भाजपचे आमदार शिवेंद्रसिंहराजे भोसले यांचे कट्टर समर्थक ज्ञानदेव रांजणे यांना आपला पाठिंबा देत जावळी तालुक्यातील 25 सोसायटी मतदार संघाचे निवडणूक मतदान प्रतिनिधी यांना सहलीवर एक महिना फिरवले होते. कधी राजस्थान, कधी केरळ तर कधी गोवा अशा एक महिना पंचवीस मतदारांना सहलीवर घेऊन जाणारे राष्ट्रवादीचे वसंतराव मानकुमरे यांनी शशिकांत शिंदे यांना या निवडणुकीमध्ये शिवेंद्रसिंहराजे भोसले यांच्या ताकतीवर मोठा झटका दिला.

राष्‍ट्रवादी काँग्रेसचे आमदार शशिकांत शिंदेंच्या जिल्हा बँक निवडणुकीतील पराभवानंतर राष्ट्रवादीच्या नेत्याचा ओ शेठ.. गाण्यावर तुफान डान्स @NCPspeaks pic.twitter.com/V72wMm819I

— Mumbai Tak (@mumbaitak) November 23, 2021

प्रत्यक्ष शिवेंद्रसिंहराजे भोसले या निवडणुकीमध्ये भलेही नामानिराळे असले व सत्ताधारी पक्षाबरोबर असले तरी ज्ञानदेव रांजणे यांच्या विजयामध्ये शिवेंद्रसिंहराजे भोसले यांचा सिंहाचा वाटा असल्याचे बोलले जात आहे. प्रत्यक्ष ज्ञानदेव रांजणे हे उमेदवार नसून या निवडणुकीत दस्तुरखुद्द पडद्यामागचे शिवेंद्रसिंहराजेचे उमेदवार असल्याची सध्या चर्चा सातारा जिल्ह्यामध्ये जोर धरू लागली होती.