मृत्यूचं तांडव… विरारमध्ये कोव्हिड हॉस्पिटलच्या ICU वॉर्डला आग, 13 रुग्णांचा होरपळून मृत्यू

मिळालेल्या माहितीनुसार, पहाटे 3 वाजेच्या सुमारास विरारमधील तिरुपती नगरच्या विजय वल्लभ हॉस्पिटलमधील (Vijay Vallabh Hospital) दुसऱ्या मजल्यावरील अतिदक्षता विभागात अचानक आग लागली.

या आगीची माहिती मिळताच विरार अग्निशमन दलाच्या 10 गाड्यांनी घटनास्थळी धाव घेतली. मात्र यावेळी आगीचं स्वरुप अत्यंत भीषण असल्यानो अग्निशमन दलाच्या जवानांना ती विझविण्यासाठी शर्थीचे प्रयत्न करावे लागले. अखेर पहाटे साडेपाच वाजेच्या सुमारास ही आग अटोक्यात आली.

Mumbai: भांडूपमधील सनराईज हॉस्पिटलला भीषण आग, 10 रुग्णांचा मृत्यू

पण दुर्दैवाने या आगीत 13 रुग्णांचा होरपळून मृत्यू झाला. दरम्यान, इतर 5 ते 6 रुग्णांना वाचविण्यात आले असून त्यांना पुढील उपचारासाठी इतर हॉस्पिटलमध्ये दाखल करण्यात आले आहे. (a fire broke out in the icu ward of covid hospital in virar killing 13 patients)

आगीचं नेमकं कारण काय?

दरम्यान, ही आग नेमकी कशामुळे लागली हे अद्याप समोर आलेलं नाही. मात्र, एसीमध्ये झालेल्या शॉर्ट सर्किंटमुळे ही आग लागली असण्याची शक्यता वर्तवण्यात येत आहे. याशिवाय या हॉस्पिटलमध्ये फायर ऑडिट देखील झालं नसल्याचं समोर आलं आहे. मात्र, या संपूर्ण घटनेबाबत अद्याप विरार महापालिकेकडून कोणतीही अधिकृत माहिती समोर आलेली नाही. लवकरच अग्निशमन दलाकडून आगीचं नेमकं कारण स्पष्ट करण्यात येईल

नाशिकच्या रूग्णालयात Oxygen ची गळती, 22 जणांचा मृत्यू

दरम्यान, यावेळी मृतांच्या नातेवाईकांनी प्रचंड आक्रोश व्यक्त करत हॉस्पिटल प्रशासनावर कठोर कारवाई करावी अशी मागणी केली आहे. मात्र, अद्याप तरी प्रशासनाकडून याप्रकरणी कोणतीही कारवाई करण्यात आलेली नाही.

भांडूपच्या सनराईज रुग्णालयात देखील आगीमुळे झाला होता 10 रुग्णांचा मृत्यू

साधारण महिन्याभरापूर्वी म्हणजे 25 मार्चला भांडूपमधील ड्रिम मॉलला लागलेल्या आगीत देखील कोरोनाच्या 10 रुग्णांचा होरपळून मृत्यू झाला होता. मॉलच्या तिसऱ्या मजल्यावर सनराईज नावाचं एक हॉस्पिटल सुरु करण्यात आलं होतं. जिथे 70 हून अधिक रुग्ण दाखल होते. यामधील सर्वाधिक रुग्ण हे कोरोना व्हायरसवर उपचार घेणारे होते. त्यावेळी लागलेल्या आगीत तब्बल 10 रुग्णांना आपले प्राण गमवावे लागले होते.

नाशिकमध्ये ऑक्सिनजच्या गळतीमुळे 22 रुग्णांचा मृत्यू

दोनच दिवसांपूर्वी नाशिकच्या डॉ. झाकीर हुसैन या शासकीय रुग्णालयात ऑक्सिजनच्या गळतीमुळे तब्बल 22 रुग्णांना आपले प्राण गमवावे लागले होते. ऑक्सिजन टँकरमधून भरत असताना अचानक झालेल्या गळतीने रुग्णालयातील ऑक्सिजन हा खंडीत झाला. यावेळी रुग्णालयात अनेक रुग्ण हे ऑक्सिजनवर होते. पण पुरवठा खंडीत झाल्याने त्यांचा अवघ्या काही मिनिटात मृत्यू झाला. या संपूर्ण घटनेबाबत स्वत: मुख्यमंत्र्यांनी सखोल चौकशीचे आदेश दिले आहेत.