मुंबईकरांच्या करोनाविरोधी लढ्याला मोठं यश; मुंबई झाली ‘कंटेनमेंट झोन फ्री’

करोनाच्या पहिल्या आणि दुसऱ्या लाटेत मुंबईत बिकट परिस्थिती निर्माण झाली होती. विशेषतः दुसऱ्या लाटेत मुंबईत भयावह स्थिती निर्माण झाली होती. कोरोना रुग्णसंख्येचा उद्रेक झाल्यानं आरोग्य सुविधांवर प्रचंड ताण आला होता. त्याचबरोबर ऑक्सिजन तुटवड्याचा प्रश्नही सुरूवातीला निर्माण झाला होता. मात्र, कोरोनाच्या दोन्ही लाटांवर मात करत मुंबई पुन्हा पूर्वपदावर येताना दिसत आहे.

स्वातंत्र्यदिनाच्या पार्श्वभूमीवर मुंबईकरांना मोठी गुड न्यूज मिळाली. मुंबईतील रिकव्हरी रेट ९७ टक्क्यांवर गेला असून, रुग्णसंख्या दुप्पटीचा वेगही १८६० दिवसांवर गेला आहे. याचा परिणाम कंटेनमेंट झोनवरही झाला आहे. मुंबईतील सर्व कंटेनमेंट झोन हटवण्यात आले आहेत.

मुंबई महापालिकेचे आयुक्त इक्बाल सिंह चहल यांनी इंडिया टुडेशी बोलताना ही माहिती दिली. ‘माझ्या आयुष्यातील हा सर्वात आनंदाचा दिवस आहे. आम्ही शहराला शून्य कंटेनमेंट करण्याच्या दिशेनं काम करत आहोत आणि आज आम्ही आमचं उद्दिष्ट पूर्ण केलं आहे’, असं महापालिका आयुक्त इक्बाल सिंह चहल म्हणाले.