नंदीग्राममधून ममता बॅनर्जी १०० टक्के जिंकणार – संजय राऊतांना विश्वास

“पाच राज्यांत होणाऱ्या निवडणुका या अत्यंत महत्वाच्या आहेत, या निवडणुकांचा जो काही निकाल लागेल त्यावरुन देशाच्या राजकारणाची पुढची दिशा ठरेल. विशेषकरुन आसाम आणि पश्चिम बंगालचे निकाल अत्यंत महत्वाचे असतील. पश्चिम बंगालमध्ये सुरु असलेलं महाभारत हे खऱ्या महाभारतापेक्षा अधिक भयानक आहे. एकीकडे देशात कोरोनामुळे परिस्थिती चिंताजनक आहे, पण दुसरीकडे संपूर्ण केंद्रीय मंत्रीमंडळ ममता बॅनर्जींना हरवण्यासाठी मैदानात उतरलंय. देश सगळं काही पाहतो आहे, पश्चिम बंगालमधली जनता सुज्ञ आहे…नंदीग्राममधून ममता बॅनर्जी १०० टक्के जिंकतील.” शिवसेनेचे राज्यसभा खासदार आणि मुख्य प्रवक्ते संजय राऊत यांनी मुंबईत पत्रकारांना आपली प्रतिक्रिया दिली.

शरद पवार ते मुख्यमंत्री ठाकरे… ममतादीदींनी देशातील बड्या नेत्यांना लिहलं पत्र!

काही दिवसांपूर्वीच ममता बॅनर्जी यांनी देशातील बिगर भाजप नेत्यांना लोकशाही धोक्यात असून भाजपविरोधात एकत्र येण्याचं आवाहन करण्याचं पत्र लिहीलं होतं. यावर बोलत असताना राऊत म्हणाले, “याआधीही लोकशाही धोक्यात होतीच, कोणाला असं वाटत असेल की लोकशाही आता संकटात आहे तर असं नाहीये. याआधीही अशी परिस्थिती तयार झाली होती. या देशात लोकांनी लढा देऊन आतापर्यंत लोकशाही जिवंत ठेवली आहे.” ममता बॅनर्जींनी पत्रात सर्वांनी एकत्र येऊन लढण्याची गरज असल्याचं म्हटलं आहे. आम्ही याच्यावर विचार करु, या गोष्टीवर चर्चा व्हायला हवी.