भाजप-मनसे युतीला रामदास आठवलेंचा विरोध कायम; उद्धव ठाकरेंनाही दिला सल्ला

कल्याण: कल्याण पश्चिमेतील खडकपाडा परिसरात एका खाजगी कामानिमित्त केंद्रीय मंत्री रामदास आठवले आले होते. यावेळी त्यांनी दसरा मेळाव्याबाबत बोलताना खरी शिवसेना एकनाथ शिंदेंचीच आहे, दसरा मेळाव्याची त्यांनाच परवानगी मिळाली पाहिजे असं वक्तव्य केलं आहे. उद्धव ठाकरे यांनी बीकेसी किंवा इतर ठिकाणी कुठेही दसरा मेळावा घ्यायला हरकत नाही. त्याच बरोबर २/३ मेजॉरिटीची एकनाथ शिंदेंसोबत आहे, त्यामुळे महानगरपालिकेनं त्यांना परवानगी द्यावी असं केंद्रीय मंत्री रामदास आठवले म्हणाले आहेत.

मनसेला सोबत घेतल्यास भाजपचा तोटा- रामदास आठवले

मागच्या अनेक दिवसांपासून मनसे आणि भाजप नेत्यांच्या भेटीगाठी वाढत आहेत. यावरुन भाजप-मनसेच्या युतीच्या चर्चा सुरु आहे. यावरती आठवले म्हणाले ”भाजप-मनसे युती झाल्यास आपला विरोध कायम असल्याचं स्पष्ट केलं आहे. यावेळी आठवले यांनी व्यक्तिगत पातळीवर राज ठाकरे यांना भेटण्यास काही हरकत नाही, मात्र मुंबई महापालिकेच्या निवडणुकीत मनसेला सोबत घेण्याची अजिबात आवश्यकता नाही.

रिपब्लिकन पक्ष भाजपसोबत आहे. एकनाथ शिंदेंचा गट हा भाजप सोबत आलेला आहे. मागच्या वेळेला भाजप आणि आरपीआय एकत्र असताना मुंबईत 82 जागा निवडून आणल्या होत्या. यंदा देखील 114 जागा निवडून येण्यात काही अडचण येणार नाही असं रामदास आठवले म्हणाले आहेत.

पुढे बोलताना आठवले म्हणाले ”राज ठाकरेंना घेतलं तर भाजपचा नुकसान होऊ शकतं. उत्तर भारतीय, गुजराती, दक्षिण भारतीय मतं मिळणार नाहीत त्यामुळे तोटा होण्याची शक्यता आहे. रिपब्लिकन पक्ष ताकतीने भाजपच्या पाठीमागे उभा आहे. राज ठाकरे यांना सोबत घेण्याची गरज नसल्याचं रामदास आठवलेंनी स्पष्ट केलं आहे.

बाळासाहेबांचा फोटो वापरण्याचा एकनाथ शिंदेंना अधिकार- रामदास आठवले

बाळासाहेब ठाकरे यांचा फोटो वापरण्यावरून उद्धव ठाकरे यांनी मुख्यमंत्री शिंदे यांना टोला लगावला होता. याबाबत बोलताना केंद्रीय मंत्री रामदास आठवले यांनी बाळासाहेबांचा फोटो वापरण्याचा एकनाथ शिंदेंना अधिकार आहे. त्यांच्या नेतृत्वाखाली तयार झालेत, बाळासाहेब हे काही एकट्या उद्धव ठाकरेंची होऊ शकत नाही, ते सर्व शिवसैनिकांचे आहेत. त्यांच्याच तालमीमध्ये तयार झालेले एकनाथ शिंदे आहेत. त्यामुळे बाळासाहेबांचा फोटो वापरायला हरकत नाही असं रामदास आठवले म्हणाले आहेत.