Tauktae Cyclone : सागरी किनारे असलेल्या जिल्ह्यांतील 12 हजारांपेक्षा जास्त नागरिकांचं स्थलांतर-मुख्यमंत्री

तोक्ते चक्रीवादळाच्या पार्श्वभूमीवर सागरी किनाऱ्यांवरील जिल्ह्यातील १२४२० नागरिकांचे स्थलांतरण करण्यात आले. मुख्यमंत्री उद्धव बाळासाहेब ठाकरे परिस्थितीवर सातत्याने लक्ष ठेऊन आहेत. मुंबई, ठाणे, पालघर जिल्ह्यांना ऑरेंज अलर्ट तर रायगड जिल्ह्याला रेड अलर्टचा इशारा देण्यात आला आहे.

— CMO Maharashtra (@CMOMaharashtra) May 17, 2021

मुंबईत (Mumbai) सध्या मोठ्या प्रमाणात तौकताई चक्रीवादळाचा (Tauktae Cyclone) परिणाम दिसून येत आहे. पहाटेपासूनच मुंबईतील अनेक भागात प्रचंड वेगाने वारे वाहत आहेत. तसंच मुसळधार पाऊस देखील सुरु आहे. यामुळे मुंबईत अनेक ठिकाणी झाडं (Tree) कोसळण्याच्या घटना घडल्या आहेत. तसंच काही ठिकाणी मोठमोठे होर्डिंग्स देखील कोसळल्याचं समोर आलं आहेत.

मुंबईतला वांद्रे-वरळी सी लिंक (Sea Link ) अर्थात सागरी सेतू हा पुढील सूचना मिळेपर्यंत बंद राहणार आहे. मुंबई महापालिकेने ट्विट करून तशी माहिती दिली आहे. वांद्रे-वरळी सी लिंक वापरणाऱ्यांनी तिथे जाऊ नये, पर्यायी मार्गांचा वापर करावा असं मुंबई महापालिकेने म्हटलं आहे. एवढंच नाही तर गरज नसल्यास मुळीच घराबाहेर पडू नका असंही मुंबई महापालिकेने म्हटलं आहे. खरंतर शनिवारीच या संदर्भातली माहिती महापौर किशोरी पेडणेकर यांनी दिली होती.

Tauktae Cyclone Live: तौकताई चक्रीवादळ मुंबईच्या समुद्रात दाखल, वाऱ्याचा तुफान वेग आणि मुसळधार पावसाच्या सरी

तौकताई हे वादळ आज (17 मे) सकाळी 7 वाजेच्या सुमारास मुंबईपासून आत 150 किमी खोल समुद्रात पोहचलं आहे. या चक्रीवादळामुळे मुंबईत सध्या मोठ्या प्रमाणात पाऊस बरसत असल्याचं पाहायला मिळत आहे. तसेच तुफान वेगाने वारा देखील वाहत आहे.

तौकताई वादळाचा प्रवास हा लांबवरचा असल्याने महाराष्ट्रतील जवळजवळ सर्वच किनारपट्टी भागातून त्याची वाटचाल झाली आहे. त्यामुळे सिंधुदुर्ग आणि रत्नागिरी जिल्ह्यातून हे वादळ पुढे सरकून आज (17 मे) पहाटे 2 वाजेच्या सुमारास रायगड (Raigad) जिल्ह्यात पोहचलं. त्यामुळे श्रीवर्धन (Shrivardhan), हरिहरेश्वर (Harihareshwar), दिवे-आगार या किनारपट्टी भागात जोरदार वारे वाहत होते.

दरम्यान, गेल्या वर्षी आलेल्या ‘निसर्ग’ चक्रीवादळाचा (Nisarga Cyclone) लँडिंग पॉईंट हा रायगड जिल्ह्यातच होता. त्यामुळे येथे प्रचंड नुकसान झालं होतं. या नुकसानात येथील नागरिक अद्याप सावरलेले देखील नाहीत तोच आता तौकताई चक्रीवादळाचा त्यांना फटका बसला आहे.