मुंबईत मंगलमूर्ती आणि अमंगलमूर्ती दोन्ही पाहिले, उद्धव ठाकरेंचा अमित शाह यांना टोला

दसरा मेळावा शिवसेनेचा म्हणजे आमचाच होणार, उद्धव ठाकरे यांची गर्जना

नेमकं काय म्हटलं आहे उद्धव ठाकरेंनी?

मुंबईत सोमवारी आपण मंगलमूर्ती आणि अमंगलमूर्ती बघितले. गणपतीच्या मंडपात देखील त्यांना राजकारण दिसलं. गणपती जिथे आहे तिथे काही अभद्र बोलू नये पण ते बोलून गेले. गणपती हा बुद्धी दाता आहे, त्यांनी सर्वांना सुबुध्दी द्यावी असं म्हणत उद्धव ठाकरेंनी अमित शाह यांना टोला लगावला आहे.

शिवसेनेचा संघर्षाचा काळ आहे

काल ते म्हणाले की यांना जमीन दाखवायची आहे. जमीन दाखवल्यावर काय बोलायचं ते बोलू. थोडक्यात काय तर आत्ता संघर्षाचा काळ आहे. शिवसेना त्यांना संपवायची आहे. मात्र जोपर्यंत कडवट आणि निष्ठावान शिवसैनिक माझ्यासोबत आहेत तोपर्यंत मला चिंता नाही. निष्ठा ही किती बोली लावली तरीही विकली जाऊ शकत नाही.

नासलेले लोक निघून गेले, राहिलेत ते निष्ठावान

बाळासाहेब ठाकरे नेहेमी म्हणत असत पसाभर नासलेले लोक असण्यापेक्षा मूठभर निष्ठावान असतील तरीही आपण मैदान जिंकू शकतो असंही उद्धव ठाकरेंनी म्हटलं आहे. शिवसेना ही काही माझी खासगी मालमत्ता नाही. तसं असतं तर ३०-४० आमदार मलाही डांबून ठेवता आले असते. ममता बॅनर्जींना मी पण ओळखतो. त्यांना तिकडे घेऊन गेलो असतो. कालीमातेचं दर्शन घडवलं असतं. राजस्थानातही त्यांना नेता आलं असतं पण तो माझा स्वभाव नाही असंही उद्धव ठाकरेंनी म्हटलं आहे.

दसरा मेळावा शिवाजी पार्क मैदानावरच होणार

मी कुणालाही अडवलेलं नाही. त्यांना सांगितलं होतं दरवाजा उघडा आहे ज्यांना जायचं त्यांनी जा. आत्ता जे माझ्यासोबत आहेत त्यांनाही आमिषं दाखवली गेली असतील की पण ते विकले गेले नाहीत कारण निष्ठा कधीही विकली जात नाही. माझ्यासोबत निष्ठावंत कडवट शिवसैनिक आहेत. बाकी अनेक गोष्टी आहेत त्या दसरा मेळाव्यात बोलेनच. दसरा मेळावा शिवाजी पार्क मैदानावर होणार. आत्तापर्यंत बोलतना मुख्यमंत्रीपदाचा मास्क असायचा जपून बोलावं लागायचं आता मात्र तसं नाही असंही उद्धव ठाकरेंनी म्हटलं आहे.