मुख्याध्यापकापासून ते शिपायापर्यंत… सावित्रीच्या लेकी सांभाळत आहेत शाळेची धुरा

महिला दिनानिमित्ताने वेगवेगळ्या क्षेत्रात कर्तृत्व आणि नेतृत्व करणाऱ्या महिलांच्या संघर्ष कहाण्या समोर येताहेत. स्वतःला सिद्ध करणाऱ्या महिला आज वेगवेगळ्या ठिकाणी आत्मविश्वासाने वावरताना दिसत आहे. बुलडाणा शहरातही एका शाळेचं काम साऱ्या जणी मिळून करत आहेत. शाळेतील शिपाईपदापासून ते मुख्याध्यापक पदापर्यंत सर्व महिलाच असून, या सावित्रीच्या लेकी यशस्वीपणे त्यांचं कर्तव्य बजावत आहेत.

बुलडाणा शहरातील सर्वसामान्य कुटुंबातील मुलांना इंग्रजी शाळेत शिक्षण घेता यावे, या उद्देशाने अतिशय कमी शुल्कामध्ये १९७२ साली शिवाजी शिक्षण संस्थेच्या बाल शिवाजी इंग्लिश कॉन्व्हेंटला सुरुवात करण्यात आली. तेव्हापासून विद्यार्थ्यांना विद्यादान करण्याचं काम सुरू आहे.