अमरावती : शिवाजी शिक्षण संस्थेवर माजी मंत्री हर्षवर्धन देशमुख यांचे एकहाती वर्चस्व

काल झालेल्या मतदानावेळी मतदान केंद्रावर तुफान राडा झाला होता.
Harshwardhan Deshmukh
Harshwardhan Deshmukh Mumbai Tak

अमरावती : स्वतंत्र भारताचे पहिले कृषिमंत्री पंजाबराव देशमुख यांनी स्थापन केलेल्या आणि राज्यातील दुसऱ्या क्रमांकाच्या समजल्या जाणाऱ्या श्री शिवाजी शिक्षण संस्थेच्या निवडणुकीत माजी मंत्री हर्षवर्धन देशमुख यांनी पुन्हा एकदा बाजी मारली. त्यांनी विकास पॅनेलचे नरेशचंद्र ठाकरे यांचा तब्बल ११७ मतांनी पराभव केला. देशमुख यांना ३८९ तर ठाकरे यांना २७२ मते मिळाली.

सत्ताधारी प्रगती पॅनेलचे ९ पैकी ८ उमेदवार निवडून आले. ४ उमेदवार कार्यकारी सदस्यपदी तर उपाध्यक्ष पदी अॅड. गजानन पुंडकर आणि अॅड. जयवंत पाटील पुसदेकर यांची निवड झाली. शिवाजी शिक्षण संस्था विदर्भातील सर्वात मोठी शिक्षण संस्था आहे. काल याची ९ जागांसाठी निवडणूक पार पडली. यात २१ उमेदवार रिंगणात उभे होते. त्यानंतर संध्याकाळी 5 वाजेपर्यंत मतदान झाले होते.

वादाने गाजली निवडणूक :

दरम्यान काल झालेल्या मतदानावेळी मतदान केंद्रावर राडा झाला होता. मतदान केंद्रावर दोन गटात मतदान केंद्रात लॉबिंग होत असल्याच्या कारणावरून विकास पॅनलचे सदस्य पदाचे उमेदवार डॉ. दिनकरराव गायगोले यांचे बंधू रवींद्र गायगोले व प्रगती पॅनलचे सदस्य पदाचे उमेदवार हेमंत काळमेघ यांच्यामध्ये वाद निर्माण झाला. हा वाद विकोपाला गेल्याने दोघेही एक दुसऱ्याच्या अंगावर धावून गेले.

वाद विकोपाला गेल्याने पोलिसांना करावा लागला लाठीचार्ज

या वादात दोन्ही गटाच्या कार्यकर्त्यांनी उडी घेतल्याने मतदान केंद्र परिसरात गोंधळ उडाला. वरुड मोर्शी मतदारसंघाचे आमदार देवेंद्र भुयार व अकोटचे शिवसेनेचे माजी आमदार संजय गावंडे यांनीही या वादात उडी घेतली. त्यानंतर पोलिसांनी लाठीचार्ज करत काहींना ताब्यात घेतले. परिसरात मोठ्या प्रमाणात गर्दी वाढल्याने गाडगे नगर पोलिसांनी बंदोबस्त वाढवला. घटनास्थळी वरिष्ठ पोलीस अधिकाऱ्यांनी येत परिस्थितीवर नियंत्रण मिळवले.

आमदार देवेंद्र भुयार हे मतदान केंद्राच्या आत असल्याने काहींनी आक्षेप नोंदवला. मी मतदान प्रतिनिधी आहे. आतमध्ये थांबण्याचा माझा अधिकार आहे. संख्येने जास्त लोक आतमध्ये होते. त्यामुळे जे प्रतिनिधी नाहीत त्यांना अधिकाऱ्यांनी बाहेर काढलं. मी प्रतिनिधी असल्याने आतमध्ये होतो तर मला धक्काबुक्की झाली नाही, असं देवेंद्र भोयर यांनी सांगितले. फुले, शाहू, आंबेडकर विचारधारा जपणारी संस्था असल्याने गैरप्रकार या संस्थेत घडणार नाही, असा विश्वास भुयार यांनी बोलून दाखवला.

Related Stories

No stories found.
Mumbai Tak
www.mumbaitak.in