Vidhanparishad: 'भ@&# माझ्याकडे हात...', अंबादास दानवेंची भाजप आमदार प्रसाद लाडांना भर सभागृहात शिवीगाळ

राहुल गांधी यांनी माफी मागावी अशी मागणी विधानपरिषदेत भाजपच्या वतीने करण्यात आली होती. ज्यानंतर याच मुद्द्यावर बोलताना अंबादास दानवे हे बोलण्यासाठी उभे राहिल्यावर प्रसाद लाड यांनी त्यांच्या दिशेने काही हातवारे केले. ज्यानंतर दानवेंचा पारा हा चांगलाच चढला आणि त्यांनी थेट अर्वाच्च भाषेत शिवीगाळ केली. 

अंबादास दानवेंनी दिली प्रसाद लाडांना शिवी, नेमकं काय घडलं?

राहुल गांधी यांच्या निषेधाचा ठराव विधानपरिषदेत करण्यात यावा अशी मागणी भाजप आमदार प्रवीण दरेकर यांनी केली. ज्यावर बोलण्यासाठी विरोधी पक्षनेते अंबादास दानवे हे उभे राहिले. पाहा यावेळी अंबादास दानवे नेमकं काय म्हणाले. 

सभापती महोदय, माझा मुद्दा हा आहे की, जे काही वक्तव्य ज्याचं असेल त्याचं लोकसभेत झालेलं आहे. त्याचा संबंध आपल्या कामकाजाशी येतो का? हा माझा प्रश्न आहे. मला असं वाटतं.. हिंदुत्वाचा मुद्दा मांडणारे हे आपल्या सभागृहामध्ये...' 

'ये तू हात नाही करायचा.. माझ्याकडे हात नाही करायचा.. तिकडे करायचा.. तिकडे करायचा.. भ@ तिकडे करायचा.. मा$&@#'

दरम्यान, या संपूर्ण घटनेनंतर सभागृह तहकूब करण्यात आलं. पण त्यानंतर प्रसाद लाड हे अत्यंत संतप्त झालेले दिसून आले. विऱोधी पक्षनेते दानवेंचा राजीनामा घ्यावा अशी मागणीच त्यांनी यावेळी केली. तसंच राजीनामा होणार नाही तोवर सभागृह चालू देणार नाही असा इशाराही त्यांनी यावेळी दिला. 

'माझा काही तोल सुटलेला नाही..'  

दुसरीकडे अंबादास दानवे यांनी देखील सभागृहातून बाहेर येताच पत्रकारांशी संवाद साधला आणि त्यांची बाजू मांडण्याचा प्रयत्न केला. यावेळी ते म्हणाले की... 

'माझा काही तोल सुटलेला नाही. मी शिवसेनाप्रमुखांच्या विचाराचा कट्टर शिवसैनिक आहे. माझ्यावर कोणी बोट उचललं तर त्याचं बोट तोडायची ताकद माझ्या मनगटात आहे. त्यामुळे माझा कोणताही तोल सुटलेला नाही. जो या विषयाशी संबंधित सभागृहाचा विषय नव्हता.. सभापतींना बोललं पाहिजे.. माझ्याकडे बोट दाखवून, हातवारे करून समोरच्या सदस्याला बोलायचा अधिकार नाही.' 

'त्यामुळे मी आमदार, विरोधी पक्ष नेता... हे सगळं नंतर मी सगळ्यात आधी शिवसैनिक आहे. मला असं वाटतं की, जो राष्ट्रवादी, वैगरे यांचे जे विचार होते आता भाजपमध्ये जुम्मा.. जुम्मा चार दिवस आलेला माणूस मला हिंदुत्व शिकवणार का?'

'माझ्यावर ७५ केसेस आहेत. सगळ्या दंगलीच्या केसेस आहेत, सगळ्या प्रकारच्या केसेस माझ्यावर आहेत. ४-४ वेळेस तडीपार झालेला शिवसैनिक आहे मी. मला हिंदुत्व शिकवणार प्रसाद लाडसारखा बाटगा.. नुस्ता धंदा करणारा पक्षाचा विचार घेऊन.. तो मला हिंदुत्व शिकवणार का?'

'मला भाषण करायचं होतं सभागृहात.. त्यामुळे मी माझे मुद्दे याचा अभ्यास करत होतो. परंतु भाजप वेगवेगळ्या विषयावर गोंधळ घालत असताना विरोधी पक्ष नेता म्हणून मला त्यावर बोलण्याचा अधिकार आहे. म्हणून मी एवढाच प्रश्न सभापतींना केला की, हा विषय आपल्या सभागृहाशी संबंधित आहे का?' 

'आहे.. नाही.. हे उत्तर देणं सभापतींचं काम आहे. त्यामुळे त्यांनी जे उत्तर दिलं असतं तर त्याचा जबाब ते सभापतीकडे मागू शकत होते. मला बोलायचं काही कारणच नव्हतं. त्यामुळे मी माझ्या जागेपासून बाजूला सारल्यापासून मी शिवसैनिक म्हणून माझा अवतार धारण केला हे सत्य आहे. माझ्याकडे विद्रूप हातवारे करायची गरजच नव्हती.'

'मला काहीही पश्चाताप होत नाही.. मी जे बोललो.. बोललो.. तो कोण माझा राजीनामा मागणारा.. माझ्या पक्षाचे नेते बघतील.' 

'हे बघा जिथे हिंसेची गरज आहे तिथे हिंदू हिंसक होतो. मी तुम्हाला सांगतोय की, माझ्यावरही काही केसेस आहेत. हिंदुत्वासाठी आहेत.. त्याचा मला काहीही पश्चाताप नाही. पण हे सगळे बोलणारे डुप्लिकेट आहेत. भाजप म्हणजे काय हिंदुत्व आहे का? हे शेपट्या टाकून पळणारे भाजपचे लोकं आम्हाला हिंदुत्व शिकवणार का?'