गणेशोत्सवात DJ दणदणाट, फटाक्यांचा आवाज... आता हायकोर्टाने थेट सरकारलाच सुनावलं
मुंबईतील गणेशोत्सवातील ध्वनी आणि वायुप्रदूषणावर मुंबई उच्च न्यायालयाची सुओ मोटो दखल. रात्री १० नंतर लाऊडस्पीकरची परवानगी आणि फटाक्यांमुळे होणाऱ्या प्रदूषणावर न्यायालयाने प्रश्न उपस्थित केले.
ADVERTISEMENT
मुंबई: मुंबईतील गणेशोत्सवाच्या उत्साहात ध्वनी आणि वायुप्रदूषणाचा मुद्दा पुन्हा ऐरणीवर आला आहे. गणेशोत्सवातील मोठ्या आवाजातील संगीत, लाऊडस्पीकर, अॅम्प्लिफायर आणि फटाक्यांमुळे होणाऱ्या प्रदूषणाबाबत मुंबई उच्च न्यायालयाने स्वतःहून कार्यवाही सुरू केली आहे.
न्यायमूर्ती जी. एस. कुलकर्णी आणि न्यायमूर्ती डॉ. नीला गोखले यांच्या खंडपीठाने या प्रश्नाला महत्त्वपूर्ण स्वरूपाचा विषय मानत महाराष्ट्र सरकारकडून उत्तर मागितले आहे. या प्रकरणात न्यायालयाला मदत करण्यासाठी ज्येष्ठ वकील अस्पी चिनॉय आणि आनंद पै यांची न्यायालयीन मित्र (Amici Curiae) म्हणून नियुक्ती करण्याची विनंतीही करण्यात आली आहे.
गणेशोत्सव साजरा करा, पण नागरिकांच्या हक्कांची पायमल्ली नको!
गणेशोत्सव आणि मिरवणुकांवर बंदी घालण्याचा न्यायालयाचा उद्देश नसल्याचे खंडपीठाने स्पष्ट केले. मात्र, उत्सव साजरा करताना निर्धारित ध्वनीमर्यादा आणि वेळेच्या नियमांचे पालन करणे आवश्यक असल्याचे न्यायालयाने अधोरेखित केले. न्यायालयाच्या निरीक्षणानुसार, मोठ्या आवाजातील संगीत आणि फटाक्यांमुळे हजारो नागरिकांच्या कायदेशीर हक्कांवर विपरीत परिणाम होऊ शकतो. यामध्ये विशेषतः पुढील नागरिकांचा विचार करण्यात आला आहे.
- आजारी आणि ज्येष्ठ नागरिक
- परीक्षांची तयारी करणारे विद्यार्थी
- मोठ्या आवाजाचा त्रास सहन करू न शकणारी लहान मुले
- ध्वनीप्रदूषणामुळे त्रस्त होणारे इतर नागरिक
काही व्यक्तींकडून होणाऱ्या अतिप्रदूषणामुळे इतर नागरिकांना त्रास सहन करावा लागू नये, अशी भूमिका न्यायालयाने मांडली.