'मी माझा निर्णय दोन दिवसांनी...' शिंदेंची धाकधूक वाढवली?, आता सगळा गेम ओमराजे निंबाळकरच्या हातात!
शिवसेना UBT पक्षाचे 6 खासदार फुटले असल्याची जोरदार चर्चा सुरू आहे. मात्र, खासदार ओमराजे निंबाळकर यांनी आज (20 जून) केलेल्या एका विधानाने शिंदे गटाची चिंता वाढली आहे.
ADVERTISEMENT
मुंबई: शिवसेना (उद्धव बाळासाहेब ठाकरे) पक्षातील कथित फुटीच्या चर्चांदरम्यान धाराशिवचे खासदार ओमराजे निंबाळकर (Omraje Nimbalkar) यांनी आज (20 जून) दिलेल्या प्रतिक्रियेमुळे महाराष्ट्राच्या राजकारणात नवा ट्विस्ट निर्माण झाला आहे. गेल्या काही दिवसांपासून ओमराजे निंबाळकर हे एकनाथ शिंदे यांच्या शिवसेनेत जाणार असल्याच्या चर्चा जोरात सुरू असताना त्यांनी प्रथमच माध्यमांसमोर ऑपरेशन टायगरबाबत भूमिका मांडली आहे.
ओमराजे निंबाळकर यांनी स्पष्ट शब्दांत सांगितले की, "मी उद्धव ठाकरे किंवा आदित्य ठाकरेंबाबत काहीही बोललेलो नाही. माझी भूमिका काहीही असली तरी मी उद्धवजी आणि आदित्यजींबद्दल आधीही कधी बोललो नाही, आताही बोलणार नाही आणि भविष्यातही बोलणार नाही."
त्यांच्या या विधानामुळे त्यांनी अद्याप ठाकरे कुटुंबाशी असलेले राजकीय आणि वैयक्तिक संबंध कायम असल्याचे संकेत दिल्याची चर्चा राजकीय वर्तुळात सुरू झाली आहे.
'दोन दिवसांनी घेणार निर्णय', ओमराजेंच्या मनात नेमकं काय?
सध्या सर्वाधिक चर्चेत असलेला मुद्दा म्हणजे ओमराजे निंबाळकर यांनी आपल्या राजकीय भवितव्याबाबत अद्याप कोणताही अंतिम निर्णय घेतलेला नसल्याचा दावा केला आहे.
