“मी एक प्रस्थापित गिळलाय”, 20 हजार मतं मिळवल्यानंतर रविराज साबळेंची प्रतिक्रिया
Raviraj Sable : छत्रपती संभाजीनगर पदवीधर निवडणुकीत अपक्ष रविराज साबळे यांना 20 हजारांहून अधिक मते मिळाली. “मी एक प्रस्थापित गिळलाय,” अशी प्रतिक्रिया त्यांनी दिली.
ADVERTISEMENT
बातम्या हायलाइट
“मी एक प्रस्थापित गिळलाय”
20 हजार मतं मिळवल्यानंतर रविराज साबळेंची प्रतिक्रिया
Raviraj Sable, मराठवाडा : छत्रपती संभाजीनगर पदवीधर मतदारसंघाच्या निवडणुकीत सोशल मीडिया इन्फ्ल्यून्सर रविराज साबळे यांनी अपक्ष उमेदवार म्हणून 20 हजारांहून अधिक मते मिळवली आहेत. तिसऱ्या क्रमांकावर असलेल्या साबळे यांनी प्रस्थापित राजकीय पक्षांच्या मक्तेदारीला आव्हान दिल्याची प्रतिक्रिया दिली आहे.
छत्रपती संभाजीनगर पदवीधर मतदारसंघाच्या निवडणुकीच्या मतमोजणीत तिसऱ्या फेरीनंतर राष्ट्रवादी काँग्रेस शरदचंद्र पवार पक्षाचे प्रतापसिंह पाटील यांनी आघाडी घेतली आहे. त्यांना आतापर्यंत 78 हजार 540 मते मिळाली आहेत. तर राष्ट्रवादी काँग्रेस अजित पवार पक्षाचे विद्यमान आमदार सतीश चव्हाण यांना 55 हजार 180 मते मिळाली आहेत. मराठवाड्यात या निवडणुकीत दोन्ही राष्ट्रवादी काँग्रेस पक्षांच्या उमेदवारांमध्ये प्रमुख लढत पाहायला मिळाली. उद्धव ठाकरे यांच्या पक्षाचे उमेदवार दिलीप घुगे या लढतीत मागे पडले असून, त्यांना आतापर्यंत 8 हजार 366 मते मिळाली आहेत. दुसरीकडे, सोशल मीडिया इन्फ्ल्यून्सर रविराज साबळे यांनी अपक्ष उमेदवार म्हणून 20 हजार 470 मते मिळवत तिसरे स्थान मिळवले आहे.
हेही वाचा : विधान परिषद निवडणूक निकाल 2026 LIVE : नागपूर पदवीधर मतदारसंघ मतमोजणी महत्वाची अपडेट
या निकालावर प्रतिक्रिया देताना रविराज साबळे यांनी आपण अपक्ष असूनही प्रस्थापितांना आव्हान दिल्याचे सांगितले. पदवीधर मतदारसंघाची निवडणूक ही प्रस्थापित राजकीय पक्षांची मक्तेदारी असल्याचे सांगत त्यांनी या मक्तेदारीत शिरून तिसऱ्या क्रमांकावर पोहोचल्याचा उल्लेख केला. आपण 24 सप्टेंबरला निवडणूक लढवण्याची घोषणा केली होती आणि त्यानंतर केवळ 28 दिवस प्रचार केला, असेही त्यांनी सांगितले. एवढ्या कमी कालावधीत प्रचार करून 20 हजारांहून अधिक मते मिळवणे, ही आपल्या दृष्टीने महत्त्वाची बाब असल्याचे त्यांच्या प्रतिक्रियेतून स्पष्ट झाले. या निवडणुकीत अपक्ष म्हणून मिळालेल्या मतांच्या जोरावर त्यांनी राजकीय पक्षांच्या उमेदवारांशी स्पर्धा केली आहे.
“मी एक प्रस्थापित गिळलाय, 18 वर्षांचा दुष्काळ संपवलाय,” अशी प्रतिक्रिया साबळे यांनी दिली. मात्र, मतमोजणी पूर्ण झाली नसल्याचेही त्यांनी स्पष्ट केले. पदवीधर मतदारसंघाच्या निवडणुकीत पहिल्या पसंतीच्या मतांनंतर दुसऱ्या पसंतीच्या मतांची मोजणी केली जाणार आहे. त्यामध्ये 41 व्या क्रमांकापासून उमेदवार बाद करण्याची प्रक्रिया सुरू होईल आणि बाद झालेल्या उमेदवारांच्या दुसऱ्या पसंतीच्या मतांची मोजणी केली जाईल, असे साबळे यांनी सांगितले. आपल्या दुसऱ्या पसंतीच्या मतांवर निवडणुकीत विजयी होणारा उमेदवार ठरण्याची शक्यता असल्याचेही त्यांनी नमूद केले. त्यामुळे प्रतापसिंह पाटील आणि सतीश चव्हाण यांच्यापैकी कोण बाजी मारणार, हे दुसऱ्या पसंतीच्या मतमोजणीनंतर स्पष्ट होणार आहे. निकालाची प्रक्रिया अद्याप सुरू असल्याने अंतिम निकालाकडे सर्वांचे लक्ष लागले आहे.