पवार स्वत: शिंदेंच्या दालनात गेले.. याचा अर्थ दिसतो तेवढा सरळ-सोप्पा नाही! भेटीमागची भन्नाट Inside Story
Sharad Pawar and Eknath Shinde Meeting: राजकारणात अनेकदा शब्दांपेक्षा भेटी अधिक बोलक्या ठरतात. शरद पवार आणि एकनाथ शिंदेंची विधानभवनातील 15 मिनिटांची भेट देखील अशाच स्वरुपाची आहे. वाचा या भेटी मागची Inside Story
ADVERTISEMENT
मुंबई: महाराष्ट्राच्या राजकारणात अनेकदा एखादी भेट, एखादं हस्तांदोलन किंवा काही मिनिटांची चर्चा ही पुढील अनेक महिन्यांच्या राजकीय घडामोडींची दिशा ठरवत असते. त्यामुळेच विधानभवनात मंगळवारी (8 जुलै) घडलेली एक घटना सध्या राजकीय वर्तुळात चर्चेचा प्रमुख विषय ठरली आहे. राष्ट्रवादी काँग्रेस (शरद पवार) पक्षाचे अध्यक्ष शरद पवार (Sharad Pawar) यांनी स्वतः पुढाकार घेत उपमुख्यमंत्री एकनाथ शिंदे (Eknath Shinde) यांच्या दालनात जाऊन त्यांची भेट घेतली. विशेष म्हणजे, त्या वेळी शिंदे मंत्रिमंडळाच्या बैठकीत व्यस्त होते. मात्र, पवार स्वतः दालनात आल्याची माहिती मिळताच शिंदेंनी कॅबिनेट बैठक काही काळासाठी सोडून तातडीने आपल्या दालनात येत त्यांची भेट घेतली.
ही घटना वरकरणी शिष्टाचार भेट वाटत असली, तरी महाराष्ट्रातील सध्याची राजकीय परिस्थिती पाहता तिचे अनेक राजकीय अर्थ लावले जात आहेत.
महाराष्ट्र एकीकरण समितीच्या बैठकीनंतर पवार थेट शिंदेंच्या दालनात
शरद पवार हे विधानभवनात आयोजित केलेल्या महाराष्ट्र एकीकरण समितीच्या बैठकीसाठी आले होते. पण बैठक संपल्यानंतर त्यांनी थेट उपमुख्यमंत्री एकनाथ शिंदे यांच्या दालनाकडे आपला मोर्चा वळवला. त्यांच्यासोबत पक्षाचे ज्येष्ठ नेते आणि आमदार जयंत पाटील, जितेंद्र आव्हाड तसेच शशिकांत शिंदे हेही उपस्थित होते. दरम्यान, पवारांनी स्वतः एकनाथ शिंदेंच्या दालनात जाण्याचा निर्णय घेतल्यामुळे या भेटीचं महत्त्व अधिक वाढलं आहे.
शिंदेंनी कॅबिनेट बैठक सोडली, पवारांचा केला मानसन्मान
जेव्हा पवार दालनाकडे गेले असल्याच उपमुख्यमंत्री एकनाथ शिंदेंना समजलं तेव्हा ते मंत्रिमंडळाच्या बैठकीत होते. अखेर ही बाब समजताच शिंदे कॅबिनेट बैठकीतून काही काळासाठी बाहेर पडले आणि त्यांनी पवारांची भेट घेतली.
