सिद्धिविनायक गणपती मंदिर न्यासाने दिले तब्बल 'एवढे' कोटी रुपये, थेट मुख्यमंत्र्यांकडे सोपवला चेक!

मुख्यमंत्री देवेंद्र फडणवीस यांच्याकडे 10 कोटींचा धनादेश

मिळालेल्या माहितीनुसार, सोमवार, 9 नोव्हेंबर 2026 रोजी सिद्धिविनायक गणपती मंदिर न्यासाच्या पदाधिकाऱ्यांनी मुख्यमंत्री देवेंद्र फडणवीस यांची भेट घेतली. यावेळी मुख्यमंत्री सहायता निधीसाठी 10 कोटी रुपयांचा धनादेश त्यांच्याकडे सुपूर्द करण्यात आला.

हे ही वाचा>> गिरगाव चौपाटीवरील छठ पुजेबाबत हायकोर्टाचा मोठा निकाल, पाहा कोर्ट काय म्हणालं

न्यासाचे अध्यक्ष सदानंद सरवणकर आणि कोषाध्यक्ष आचार्य पवनकुमार त्रिपाठी यांनी मुख्यमंत्र्यांना हा धनादेश दिला. राज्यातील दुष्काळग्रस्त शेतकरी आणि नैसर्गिक आपत्तींमुळे प्रभावित झालेल्या नागरिकांना आर्थिक मदत मिळावी, या उद्देशाने हा निर्णय घेण्यात आला आहे.

न्यासाच्या व्यवस्थापन समितीचा महत्त्वपूर्ण निर्णय

सिद्धिविनायक गणपती मंदिर न्यासाच्या व्यवस्थापन समितीने राज्यातील संकटग्रस्त नागरिकांच्या मदतीसाठी 10 कोटी रुपये देण्याचा निर्णय घेतला होता. नैसर्गिक आपत्तींचा फटका बसलेल्या नागरिकांना अशा वेळी आर्थिक मदतीची मोठी गरज असते. विशेषतः दुष्काळामुळे अडचणीत आलेल्या शेतकरी कुटुंबांना दिलासा देण्यासाठी मुख्यमंत्री सहायता निधीच्या माध्यमातून मदत उपलब्ध करून देण्याचा न्यासाचा प्रयत्न आहे.

हे ही वाचा>> 'त्या' सिलबंद 4 मतांचं काय होणार? गोकुळचा हायकोर्टाचा आदेश समजून घ्या

या निर्णयामुळे आपत्तीग्रस्तांना मदत करण्यासाठी धार्मिक आणि सामाजिक संस्थाही महत्त्वाची भूमिका बजावू शकतात, हे पुन्हा एकदा अधोरेखित झालं आहे.

धनादेश सुपूर्द करताना न्यासाचे पदाधिकारी उपस्थित

मुख्यमंत्री देवेंद्र फडणवीस यांना धनादेश सुपूर्द करताना न्यासाचे अध्यक्ष सदानंद सरवणकर आणि कोषाध्यक्ष आचार्य पवनकुमार त्रिपाठी यांच्यासह अनेक पदाधिकारी उपस्थित होते.

यावेळी न्यासाच्या विश्वस्त मीना कांबळी, महेश मुदलियार, गोपाल दळवी, जितेंद्र राऊत, मनीषा तुपे आणि सुदर्शन सांगळे उपस्थित होते. तसेच न्यासाच्या कार्यकारी अधिकारी राखी चव्हाण यांचीही उपस्थिती होती.

मागील वर्षीही पूरग्रस्तांसाठी दिली होती 10 कोटींची मदत

सिद्धिविनायक गणपती मंदिर न्यासाने यापूर्वीही नैसर्गिक आपत्तीच्या काळात मदतीचा हात पुढे केला होता. मागील वर्षी महाराष्ट्रातील अनेक भागांमध्ये अतिवृष्टीमुळे पूरस्थिती निर्माण झाली होती. या नैसर्गिक आपत्तीमुळे अनेक नागरिक आणि शेतकरी प्रभावित झाले होते. त्यावेळीही न्यासाने मुख्यमंत्री सहायता निधीमध्ये 10 कोटी रुपयांची आर्थिक मदत दिली होती.

आता यंदा दुष्काळग्रस्त शेतकरी आणि आपत्तीग्रस्त नागरिकांसाठी पुन्हा एकदा 10 कोटी रुपये देण्याचा निर्णय घेण्यात आला आहे. त्यामुळे सलग नैसर्गिक संकटांच्या काळात न्यासाने सामाजिक बांधिलकी जपण्याचा प्रयत्न केला आहे.

दरम्यान, महाराष्ट्रातील दुष्काळग्रस्त भागांमध्ये शेतकरी आणि सामान्य नागरिकांना आर्थिक मदतीची आवश्यकता आहे. अशा परिस्थितीत सिद्धिविनायक गणपती मंदिर न्यासाने दिलेल्या 10 कोटी रुपयांच्या योगदानामुळे मुख्यमंत्री सहायता निधीला बळ मिळणार आहे. या निधीचा उपयोग पात्र आपत्तीग्रस्तांना मदत करण्यासाठी केला जाणार आहे.