उद्धव ठाकरेंना सल्ला, एकनाथ शिंदेंना ऑफर; आंबेडकरांच्या मनात नेमकं काय?

वंचित बहुजन आघाडीला मविआमध्ये घ्यायचं की नाही याबाबत अद्याप निर्णय होऊ शकलेला नाही. वंचित बहुजन आघाडी हा उद्धव ठाकरेंच्या शिवसेनेचा मित्र पक्ष असल्याने ठाकरेंच्या वाट्याला येणाऱ्या जागांमधून त्यांनी वंचितला जागा द्याव्या, असा मविआच्या नेत्यांचा सूर आहे. 10 महिन्यांवर लोकसभेची निवडणूक आल्याने मविआच्या जागावाटपाच्या चर्चा सध्या सुरु झाल्या आहेत. आता यात वंचितला सोबत घेतलं जाणार की नाही असा प्रश्न आहे. त्याचबरोबर जागा वाटपावरुन मविआत कुरबुरी देखील सुरु झाल्या आहेत.

अशातच काँग्रेस आणि राष्ट्रवादीच्या नादात शिवसेनेचा बळी जाऊ देऊ नका असं प्रकाश आंबेडकर म्हणतायेत. एकप्रकारे उद्धव ठाकरेंना मविआतून बाहेर पडण्यासाठीच प्रकाश आंबेडकर सुचवत आहेत. प्रकाश आंबेडकरांच्या या वक्तव्यावर शरद पवारांनी सध्या तरी बोलणं टाळलं आहे.

प्रकाश आंबेडकरांनी एकनाथ शिंदेंना कोणती ऑफर दिली?

दुसरीकडे याच सभेमध्ये प्रकाश आंबेडकरांनी एकनाथ शिंदेंच्या भेटीबाबतही अनेक खुलासे केले आहेत. रिक्षावाला मुख्यमंत्री झाल्याचा आनंद असल्याचं प्रकाश आंबेडकर म्हणाले आहेत. त्याचबरोबर शिंदेंनी भाजपची साथ सोडून वंचितसोबत यावं, अशी खुली ऑफरही आंबेडकरांनी यावेळी दिली. आंबेडकर या भाषणात काय म्हणाले तेच विधान नेमकं काय?

“आतापर्यंत श्रीमंतांची माणसं झाली (मुख्यमंत्री). एक रिक्षावाला मुख्यमंत्री झाला यातच आमचा आनंद आहे. मी म्हणण्यापेक्षा शिंदेंच म्हणाले की, प्रकाशराव ही घटना आहे म्हणून झालो, ‘नाहीतर आपल्याला कुणीच विचारलं नसतं.’ मी त्यांना म्हणालो, तुमचे मित्र… त्यांचं काय? ते म्हणाले, ‘अवघड दुखणं असतं प्रकाशराव.’ मी त्यांना म्हणालो पडा बाहेर आपण एकत्र येऊ’, असं प्रकाश आंबेडकर या सभेत म्हणाले.

हेही वाचा >> Vilasrao Deshmukh : विलासरावांनी ‘हात’ दिला अन् गोपीनाथ मुंडे विरोधी पक्षनेते झाले

एकीक़डे प्रकाश आंबेडकर ठाकरेंच्या शिवसेनेसोबत निवडणुका लढवण्याची तयारी करत आहेत. तर दुसरीकडे एकनाथ शिंदे यांना देखील भाजपची साथ सोडून सोबत येण्याची ऑफर देतायेत. या आधी देखील प्रकाश आंबेडकर आणि एकनाथ शिंदे यांची अनेकदा भेट झाली आहे. या भेटीची कारणं वेगवेगळी असली तरी त्यात राजकीय परिस्थितीवर देखील चर्चा झाली आहे.

२०१९ च्या लोकसभा आणि विधानसभा निवडणुकांमध्ये मोठ्याप्रमाणावर वंचितने मतं मिळवली होती. विधानसभेच्या निवडणुकांमध्ये वंचितचे उमेदवारांनी दुसऱ्या क्रमाकांची मतं घेतली होती. त्यामुळे वंचितला सोबत घेणं राजकीय पक्षांना महत्त्वाचं ठरणार आहे.

हेही वाचा >> ‘महिलेसोबत नको त्या अवस्थेत…’, खडसे महाजनांवर टीका करताना काय बोलले?

अशातच आता प्रकाश आंबेडकर ठाकरे आणि शिंदेंना सोबत येण्याच्या ऑफर देत आहेत. ठाकरे आणि शिंदे येत्या काळात एकत्र येणं अवघड असलं तरी राजकारणात काहीही अशक्य नसतं असं बोललं जातं, त्यामुळे आंबेडकरांच्या या ऑफरमुळे येत्या काळात राज्यात काय राजकारण रंगतं हे पाहणं महत्त्वाचं असणार आहे.