Angelo Mathews Time Out : सौरभ गांगुली होणार होता ‘टाइम आऊट’, पण…

श्रीलंकेचा फलंदाज अँजेलो मॅथ्यूज टाइम आऊट होण्याचा हा वाद सुरू झाला आहे. मॅथ्यूज आता आंतरराष्ट्रीय क्रिकेटमध्ये टाइम आउट होणारा जगातील पहिला क्रिकेटपटू ठरला आहे. पण इथे महत्त्वाचं असं की, मॅथ्यूजच्या आधी भारतीय संघाचा माजी कर्णधार सौरव गांगुली देखील एकदा टाइम आऊट होता होता वाचला होता.

Time Out : गांगुलीसोबत 16 वर्षांपूर्वी काय घडलं होतं?

ही घटना घडली होती 16 वर्षांपूर्वी. त्यावेळी गांगुली बाद झाला असता तर आता अशा प्रकारे बाद होणारा मॅथ्यूज दुसरा फलंदाज ठरला असता. पण त्यावेळी दादा म्हणून दबदबा असलेला गांगुली टाइम आऊट होण्यातून थोडक्यात बचावला होता. आता हा प्रश्न नक्कीच चाहत्यांच्या मनात असेल की शेवटी ते प्रकरण काय होतं? आणि गांगुली त्यातून कसा वाचला?

हे ही वाचा >> कपटी वहिनीचे अनैतिक संबंध… नवऱ्याला सांगून नणंदेची क्रूर हत्या!

खरंतर, ही गोष्ट आहे 2007 मधील दक्षिण आफ्रिका दौऱ्यावेळची. जेव्हा भारतीय संघ आणि दक्षिण आफ्रिका यांच्यात केपटाऊन कसोटी सामना खेळला जात होता. त्या सामन्याच्या चौथ्या दिवशी भारतीय संघाने दुसऱ्या डावात तिसऱ्या षटकात दोन्ही सलामीवीरांच्या विकेट्स 6 धावांत गमावल्या. वीरेंद्र सेहवाग आणि वसीम जाफर बाद झाले.

गांगुलीला मैदानावर येण्यास झाला 6 मिनिटे उशीर

यानंतर सचिन तेंडुलकर येणार होता, मात्र सामन्याच्या तिसऱ्या दिवशी तो काही काळ मैदानाबाहेर राहिला. त्यामुळे तो निर्धारित वेळेपूर्वी फलंदाजीसाठी येऊ शकला नाही. तर व्हीव्हीएस लक्ष्मण अंघोळीसाठी गेला होता. त्यावेळी सौरव गांगुली ट्रॅकसूटवर फिरत होता. त्याला लगेच तयार होऊन मैदानात यायचं होतं. मग सगळे गांगुलीला तयार करायला लागले.

हे ही वाचा >> Angelo Mathews : न खेळताच फलंदाज होतो बाद, ‘टाइम आऊट’ आहे तरी काय?

घाई करूनही गांगुलीला मैदानात येण्यास 6 मिनिटे उशीर झाला. दुसरीकडे नियमानुसार त्याला 3 मिनिटांत चेंडू खेळायचा होता. गांगुली 6 मिनिटं उशिराने आला तेव्हा पंचांनी सर्व नियम आणि प्रकरण दक्षिण आफ्रिकेच्या संघाचा कर्णधार ग्रॅमी स्मिथला समजावून सांगितले होते.

त्यावेळी स्मिथने टाइम आऊट करण्याचे अपील केले नाही. त्याने खिलाडूवृत्ती जपली आणि गांगुलीविरोधात टाइम आऊटचं अपील केलं नाही अन् गांगुली टाइम आऊट होता होता राहिला.

हेल्मेटमुळे अँजेलो मॅथ्यूज झाला टाइम आऊट

श्रीलंकेच्या डावात अँजेलो मॅथ्यूजला 25व्या षटकात टाइम आऊट घोषित करण्यात आलं. 146 वर्षांच्या क्रिकेट इतिहासात पहिल्यांदाच एखादा फलंदाज टाइम आऊट झाला. हे 25 वे षटक शकीबने टाकले, ज्याच्या दुसऱ्या चेंडूवर सदीरा समरविक्रमा बाद झाली. यानंतर मॅथ्यूज मैदानात आला, पण खेळपट्टीवर पोहोचताच त्याची हेल्मेटची पट्टी तुटली.

त्यानंतर मॅथ्यूजने लगेच ड्रेसिंग रुमकडे बोट दाखवून दुसरे हेल्मेट मागितले, पण नजमुल हुसैन शांतोच्या विनंतीवरून गोलंदाज शाकिब अल हसनने अपील केले, त्यावर मैदानावरील पंचांनी मॅथ्यूजला टाइम आऊट ठरवले. अशाप्रकारे षटकाचा पुढचा चेंडू टाकण्यापूर्वीच मॅथ्यूज एकही चेंडू न खेळता बाद झाला.