Personal Finance: नवा कोरा फ्लॅट घेतला पण Societyच्या नावावर जमीन नसेल तर तुमचं काही खरं नाही!

जमीन कोणाच्या नावावर आहे हे का महत्त्वाचं? 

एखाद्या इमारतीतील फ्लॅट तुमच्या नावावर असला, तरी इमारत ज्या जमिनीवर उभी आहे त्या जमिनीचा हक्क वेगळ्या व्यक्ती, संस्था किंवा मूळ जमीनमालकाकडे असू शकतो. काही प्रकरणांमध्ये सोसायटीकडे जमीन आणि इमारतीबाबत आवश्यक हक्क हस्तांतरित झालेले नसू शकतात. त्यामुळे खरेदीदाराने Land Title आणि Societyचा जमिनीवरील हक्क स्पष्ट आहे का, हे तपासणं आवश्यक आहे.

कोणती कागदपत्रं तपासावीत? 

फ्लॅट खरेदी करण्यापूर्वी जमीन आणि इमारतीशी संबंधित कागदपत्रांची कायदेशीर तपासणी करून घेणं योग्य ठरतं. यामध्ये Sale Deed, Conveyance Deed किंवा संबंधित हक्कपत्र, Property Card/7-12 उतारा, Development Agreement, मंजूर बांधकाम कागदपत्रे आणि सोसायटीशी संबंधित कागदपत्रे यांचा समावेश होऊ शकतो.

विशेषतः Conveyance Deed झालं आहे का किंवा जमीन सोसायटीच्या नावावर कायदेशीररीत्या हस्तांतरित झाली आहे का, हे तपासणं महत्त्वाचं आहे.

पुढे कोणत्या अडचणी येऊ शकतात? 

जमिनीच्या मालकीबाबत स्पष्टता नसल्यास भविष्यात फ्लॅट विकताना, कर्ज घेताना, पुनर्विकासाच्या वेळी किंवा मालकी हक्कावर वाद निर्माण झाल्यास अडचणी येऊ शकतात. एखाद्या प्रकल्पात जमीनमालक आणि सोसायटी यांच्यात वाद असल्यास त्याचा परिणाम रहिवाशांवरही होऊ शकतो.

खरेदीदाराने काय करावं?

फ्लॅट घेण्यापूर्वी बिल्डर किंवा विक्रेत्याने दिलेल्या कागदपत्रांवरच अवलंबून न राहता स्वतंत्र Property Lawyerकडून Title Search आणि कागदपत्रांची तपासणी करून घ्यावी. तसेच सोसायटीकडे जमिनीबाबत कोणते हक्क आहेत, याची माहिती घ्यावी.

फ्लॅट सुंदर आहे, लोकेशन उत्तम आहे आणि किंमतही योग्य आहे म्हणून लगेच निर्णय घेऊ नका. घरासोबत त्या घराखालील जमिनीचा कायदेशीर हक्कही स्पष्ट आहे का, हे तपासणं तितकंच महत्त्वाचं आहे.