मुंबई : सराफ दुकानातून 7 कोटी 88 लाखांचे सोने चोरीला, कामगारांनीच डुप्लिकेट चावी करुन मारला डल्ला

डुप्लिकेट चावीने उघडले दुकान

बोरीवलीच्या आयसी कॉलनीतील 'माय गोल्ड पॉइंट' या दुकानात 13 आणि 14 जानेवारीच्या दरम्यान ही चोरी झाली. सकाळी जेव्हा दुकान उघडले, तेव्हा शोकेस रिकामे असल्याचे पाहून मालकाचे धाबे दणाणले. तब्बल 5 किलो सोन्याचे दागिने गायब होते. विशेष म्हणजे दुकानाचा दरवाजा तोडलेला नव्हता, तर तो डुप्लिकेट चावीने उघडण्यात आला होता. यामुळे पोलिसांचा संशय सुरुवातीलाच दुकानातील व्यक्तींवर गेला.

हेही वाचा : पालघरमध्ये मोठी दुर्घटना, विषारी वायू गळतीमुळे नागरिकांमध्ये घबराट; 2600 जणांचं रेस्क्यू ऑपरेशन

विश्वासू कर्मचाऱ्यांचाच घात

घटनेनंतर दुकानातील दोन कर्मचारी अचानक गायब झाल्याने पोलिसांचा संशय बळावला. सीसीटीव्ही फुटेज आणि तांत्रिक तपासाअंती असे लक्षात आले की, दुकानाची चावी ज्या कर्मचाऱ्यांकडे असायची, त्यांनीच त्याचा गैरफायदा घेतला. गणपत चदाना (वय 26) आणि किशनलाल उर्फ भैरू बगालाल रेबारी (वय 21) अशी अटक करण्यात आलेल्या आरोपींची नावे आहेत. या दोघांनी बनावट चावी तयार करून मध्यरात्री दुकानात प्रवेश केला आणि कोट्यवधींचे दागिने लंपास केले.

3 किलो सोने हस्तगत, मुख्य आरोपी फरार

पोलिसांनी केलेल्या कारवाईत आतापर्यंत 3 किलो 100 ग्रॅम सोने जप्त करण्यात आले आहे. या गुन्ह्यात एका अल्पवयीन मुलाचाही सहभाग निष्पन्न झाल्याने त्याला बालसुधारगृहात पाठवण्यात आले आहे. मात्र, या प्रकरणातील एक मुख्य आरोपी अद्याप फरार असून त्याच्याकडे उर्वरित 4 किलो सोने असल्याची शक्यता पोलिसांनी वर्तवली आहे. त्याला पळून जाण्यासाठी इतर साथीदारांनी वाहन आणि इतर रसद पुरवल्याचेही तपासात उघड झाले आहे.

व्यापाऱ्यांमध्ये चिंतेचे वातावरण

या मोठ्या चोरीमुळे बोरीवली परिसरातील ज्वेलर्स आणि व्यापाऱ्यांमध्ये भीतीचे वातावरण पसरले आहे. विश्वासातील माणसांनीच अशा प्रकारे डल्ला मारल्यामुळे सुरक्षेचा प्रश्न पुन्हा ऐरणीवर आला आहे. फरार आरोपीचा शोध घेण्यासाठी पोलिसांनी पथके रवाना केली असून, लवकरच त्याला बेड्या ठोकल्या जातील, असा विश्वास पोलिसांनी व्यक्त केला आहे.

इतर महत्त्वाच्या बातम्या 

फडणवीस साहेब, लंडनला निघालेला माझा मुलगा कुवैतमध्ये अडकलाय, विशाखा सुभेदार यांनी हंबरडा फोडला, मदतीसाठी याचना