मुंबई : लोकल ट्रेनमध्ये वादावादी, खाली उतरताना प्राध्यापकाच्या पोटात चाकू खुपसला; उपचारादरम्यान मृत्यू

मिळालेल्या माहितीनुसार, आलोक कुमार सिंह हे मुंबईतील एका खासगी महाविद्यालयात प्राध्यापक म्हणून कार्यरत होते. शनिवारी सायंकाळी कामावरून घरी परतण्यासाठी ते लोकल ट्रेनने प्रवास करत होते. लोकलमधील गर्दीदरम्यान त्यांचा एका सहप्रवाशासोबत किरकोळ कारणावरून शाब्दिक वाद झाला. वाद नेमका कशावरून झाला, याबाबत अद्याप स्पष्ट माहिती समोर आलेली नाही.

हेही वाचा : जालना : कॉलेजला निघालेल्या तरुणीला बळजबरीने कारमध्ये बसवून आळंदीला नेलं, अन् थेट लग्नच केलं

सूत्रांच्या माहिती नुसार, दोघांमधील वाद काही काळ सुरू होता. त्यावेळी दोघांनी एकमेकांना तुला बघून घेतो, अशी धमकी दिली होती. दरम्यान, लोकल ट्रेन मलाड रेल्वे स्थानकात प्रवेश करत असताना आलोक हे उतरायच्या तयारीत दरवाज्याजवळ उभे राहिले. याच वेळी आरोपीने अचानक त्यांच्या पोटात चाकूने वार केला. या हल्ल्यामुळे ट्रेनमध्ये आणि प्लॅटफॉर्मवर गोंधळ उडाला. आलोक हे रक्तबंबाळ अवस्थेत खाली कोसळले. घटनेनंतर आरोपीने चालत्या ट्रेनमधून उडी मारून घटनास्थळावरून पलायन केले. प्रवाशांना काही कळायच्या आतच तो पसार झाला. घटनेची माहिती मिळताच रेल्वे पोलिसांनी तातडीने घटनास्थळी धाव घेतली.

जखमी आलोक यांना तत्काळ जवळच्या शताब्दी रुग्णालयात दाखल करण्यात आले. मात्र, चाकूचा वार गंभीर असल्याने डॉक्टरांनी केलेल्या उपचारांनंतरही त्यांचा मृत्यू झाला. डॉक्टरांनी उपचारादरम्यान मृत्यू झाल्याचे स्पष्ट केले आहे. आलोक कुमार सिंह हे मूळचे उत्तर प्रदेशातील रहिवासी होते. दोन वर्षांपूर्वीच त्यांचा विवाह झाला होता. त्यांच्या अचानक निधनामुळे कुटुंबीयांवर मोठा आघात झाला आहे.

या प्रकरणी बोरीवली जीआरपीने अज्ञात आरोपीविरोधात भारतीय न्याय संहिता कलम 103 अंतर्गत गुन्हा दाखल केला आहे. स्थानक परिसरातील सीसीटीव्ही फुटेज तपासण्यात येत असून प्रत्यक्षदर्शींचे जबाब नोंदवले जात आहेत. आरोपीचा शोध घेण्यासाठी तपास सुरू आहे.

इतर महत्त्वाच्या बातम्या 

चौथीच्या विद्यार्थ्याला काळंनिळं पडेपर्यंत मारलं, प्रश्नाचं उत्तर न दिल्याने बुलढाण्यातील शिक्षकाची क्रूरता