मुंबईची खबर: मुंबईत मिळणार स्वस्तात घर! 'MHADA' मध्ये निघाली मोठी लॉटरी, बघा तुमचा नंबर लागतोय का..

अर्ज नोंदणी आणि अर्ज भरणा प्रक्रियेचा शुभारंभ

उद्या म्हणजेच (14 जुलै 2025) सोमवारी दुपारी 1 वाजता सदर सोडतीसाठी अर्ज नोंदणी व अर्ज भरणा प्रक्रियेचा शुभारंभ 'गो-लाइव्ह' कार्यक्रमांतर्गत होणार असून 'म्हाडा'चे उपाध्यक्ष तथा मुख्य कार्यकारी अधिकारी संजीव जयस्वाल (भा.प्र.से.) यांच्या हस्ते करण्यात येणार आहे. या सोडतीसाठी 13 ऑगस्ट रोजी रात्री 11.59 वाजेपर्यंत ऑनलाइन अर्ज करण्याची मुदत आहे. 14 ऑगस्ट रोजी रात्री 11.59 वाजेपर्यंत अर्जदार अनामत रकमेचा भरणा ऑनलाइन करू शकतील. सर्व कागदपत्रांची पूर्तता करणारे अर्जदार याद्वारे पात्र ठरवले जातील. सोडतीसाठी स्वीकृत अर्जांची प्रारूप यादी 21 ऑगस्ट रोजी सायंकाळी 6 वाजता म्हाडाच्या https://housing.mhada.gov.in या अधिकृत वेबसाइटवर प्रसिद्ध केली जाणार आहे. दिनांक 25 ऑगस्ट 2025 रोजी सायंकाळी 6 वाजेपर्यंत अर्जदारांना प्रारूप यादीवर आपल्या दावे व हरकती नोंदवता येणार आहेत. सोडतीसाठी स्वीकृत अर्जाची अंतिम यादी दिनांक 1 सप्टेंबर, 2025 रोजी सायंकाळी 6 वाजता 'म्हाडा'च्या संकेतस्थळावर प्रसिद्ध केली जाणार आहे. 

'या' सदनिका उपलब्ध 

म्हाडाच्या कोकण विभागातर्फे जाहीर करण्यात आलेली ही सोडत पाच घटकांमध्ये विभागण्यात आली आहे.  20 टक्के सर्वसमावेशक योजनेअंतर्गत एकूण 565 सदनिका, 15 टक्के एकात्मिक शहर गृहनिर्माण योजनेअंतर्गत 3002 सदनिका, म्हाडा कोकण मंडळ गृहनिर्माण योजना व विखुरलेल्या सदनिका, आहे त्या स्थितीमध्ये या योजनेअंतर्गत 1677 सदनिका, म्हाडा कोकण मंडळ गृहनिर्माण योजनेअंतर्गत (50 टक्के परवडणार्‍या सदनिका) 41 सदनिका विक्रीसाठी उपलब्ध आहेत.

हे ही वाचा:  "दुसऱ्या जातीतील मुलाशी लग्न..." नाराज वडिलांनीच राधिकाची केली हत्या; नवीन अपडेट आली समोर!

अर्जाची संगणकीय सोडत

यामध्ये पात्र अर्जाची संगणकीय सोडत ठाणे येथील डॉ. काशीनाथ घाणेकर नाट्यगृह येथे दिनांक 3 सप्टेंबर 2025  रोजी सकाळी 10 वाजता जाहीर केली जाणार आहे. अर्जदारांना सोडतीचा निकाल तात्काळ मोबाईलवर एसएमएस द्वारे , ई-मेल द्वारे तसेच अॅपवर प्राप्त होणार आहे. 

हे ही वाचा: पैसा-पाणी: वेदांतामध्ये नेमकं काय चालले आहे?

कसा कराल अर्ज?

अर्ज करण्याच्या प्रक्रियेस 14 जुलै रोजी दुपारी 1 वाजल्यापासून सुरुवात होणार असून नागरिकांना IHLMS 2.0 संगणकीय प्रणाली व अॅपच्या साहाय्याने अर्ज करता येणार आहे. या सोडतीमध्ये सहभागी होण्यासाठी अर्जदार IHLMS 2.0 ही सोडतीची संगणकीय आज्ञावली अँड्रॉइड अथवा आयओएस या दोन्ही ऑपरेटिंग सिस्टिमच्या साहाय्याने आपल्या मोबाइलवर डाउनलोड करू शकतात. अर्जदारांच्या सोयीकरिता https://housing.mhada. gov.in या म्हाडाच्या अधिकृत संकेतस्थळावर अर्जनोंदणी प्रक्रिया उपलब्ध करून देण्यात आली आहे.