नवी मुंबई विमानतळावर प्रवाशांसाठी वाहतुकीची मोठी सोय! बस, टॅक्सी, रिक्षासह अनेक पर्याय

हेही वाचा : बंटी पाटलांना कोंडीत पकडण्याचा फडणवीसांचा प्लॅन? पुणे पदवीधर निवडणुकीत स्मिता जाधवांच्या एन्ट्रीची इनसाईड स्टोरी!

अदानी एअरपोर्ट होल्डिंग्स लिमिटेडकडून विमानतळाचे संचालन केले जात असून, मुंबई, नवी मुंबई, पुणे आणि मुंबई या भागातील प्रवाशांसाठी परवडणारे प्रवासाचे पर्याय उपलब्ध करून देण्यात येत आहेत. महाराष्ट्र राज्य मार्ग परिवहन महामंडळाची ई-शिवाई बस सेवा 7 ऑक्टोबरपासून सुरू होणार आहे. या बससेवेतून नवी मुंबई आंतरराष्ट्रीय विमानतळ ते पुणे 450 रुपये, बोरिवली 210 रुपये आणि दादर पूर्व 170 रुपये असे भाडे आकारले जाणार आहे. 12 वर्षांखालील मुले आणि नॅशनल कॉमन मोबिलिटी कार्डसह प्रवास करणाऱ्या महिलांना अर्धे भाडे लागू होणार आहे.

हेही वाचा : परभणी : कर्जाचा डोंगर, दुष्काळाचा फटका, कुटुंब रस्त्यावर आलं, मिरखेल गावात काय घडलं?

दादरची बस सायन आणि अटल सेतूमार्गे धावणार असून बोरिवलीची सेवा छत्रपती शिवाजी महाराज आंतरराष्ट्रीय विमानतळाच्या टर्मिनल 1, वांद्रे आणि अटल सेतूला जोडणार आहे. नवी मुंबई विमानतळ आणि पुणे दरम्यान दररोज दोन फेऱ्या चालवल्या जाणार आहेत. ठाणे आणि नाशिकसाठी बससेवा नोव्हेंबरच्या मध्यापर्यंत सुरू करण्याचे नियोजन आहे. याशिवाय चलो बसच्या दररोज 21 सेवा, नवी मुंबई महानगर परिवहनच्या सात विमानतळ मार्गिका आणि  टॅक्सी, उबर गो व उबर प्रीमियर या सेवाही उपलब्ध असतील. सिटीफ्लो, आर्या आणि चलोकडून दर तासाला विनामूल्य शटल सेवा चालवली जाणार असून, ती नवी मुंबई विमानतळाला मुंबईतील छत्रपती शिवाजी महाराज आंतरराष्ट्रीय विमानतळाशी जोडेल.

चलो बस अंधेरी पूर्वेतील मरोळ, वांद्रे, दादर आणि कुलाब्यातील वर्ल्ड ट्रेड सेंटरपर्यंत धावणार आहे. एनएमएमटीच्या ए 1 ते ए 7 या मार्गिका टर्मिनल 1 ला खारकोपर, तारघर, बेलापूर, नेरुळ, पनवेल, खारघर आणि विमानतळ प्रकल्प कार्यालयासह विविध ठिकाणांशी जोडतील. बेलापूर आणि नेरुळच्या बस गर्दीच्या वेळेत दर 15 ते 20 मिनिटांनी धावणार आहेत. उबर ऑटोची सुविधाही उपलब्ध असेल. प्रीपेड टॅक्सी, प्रीपेड रिक्षा आणि कार भाड्याने घेण्याचे पर्यायही आहेत. भारत टॅक्सीची सेवा 10 ऑक्टोबरपासून सुरू होणार असून, त्यासाठी 40 वाहनांचा ताफा उपलब्ध असेल. विमानतळावरील जमिनीवरील वाहतूक क्षमतेत 3,787 अॅप-आधारित कॅब, 547 बस, 184 भाडेतत्त्वावरील कार आणि 171 रिक्षांसह एकूण 4,594 वाहने आहेत. विमानतळ पनवेल, तारघर आणि बामणडोंगरी रेल्वे स्थानकांशी तसेच अटल सेतू, सायन-पनवेल महामार्ग, पाम बीच रोड, अमर मार्ग आणि एनएच-458 शी जोडलेले आहे. नवी मुंबई मेट्रो मार्गिका 1 कार्यरत असून दोन्ही विमानतळांना जोडण्यासाठी मुंबई मेट्रो मार्गिका 8 प्रस्तावित आहे. विमानतळ परिसरात इलेक्ट्रिक वाहनांसाठी चार्जिंग सुविधा उभारण्यासाठी विमानतळ प्रशासन अदानी टोटल एनर्जीज गॅससोबत काम करत आहे.