मोठी बातमी: 'कोणीही वाचण्याची शक्यता नाही', 242 जण असलेल्या Air India विमान अपघाताबाबत खळबळ उडवणारी अपडेट

या बोईंग 787 ड्रीमलाइनर विमानात क्रू मेंबर्ससह एकूण 2402 लोक होते. अपघाताच्या वेळी दुपारी 2 वाजले होते आणि हे ठिकाण सरदार वल्लभभाई पटेल आंतरराष्ट्रीय विमानतळाजवळ आहे.

हे ही वाचा>> Air India Plane Crash: अपघात झाला त्या विमानाचे 'ते' 2 पायलट्स नेमके कोण?

'कोणीही वाचण्याची शक्यता नाही', अहमदाबादचे पोलीस आयुक्तांची माहिती

अहमदाबादचे पोलीस आयुक्त जी.एस. मलिक यांनी 'आज तक'शी बोलताना विमान अपघाताबद्दल चिंता व्यक्त केली आणि सांगितले की, 'अपघाताची तीव्रता पाहता, कोणीही वाचण्याची शक्यता खूपच कमी दिसते. काही जखमींना उपचारासाठी रुग्णालयात आणण्यात आले होते, परंतु त्यांची प्रकृती खूपच गंभीर होती आणि त्यांना वाचवणे कठीण होत आहे.' आयुक्त मलिक पुढे असेही म्हणाले की, 'बचावकार्य सुरू आहे, परंतु ढिगारा आणि आगीमुळे परिस्थिती खूपच आव्हानात्मक आहे.'

टाटा समूहाचे अध्यक्ष एन. चंद्रशेखरन अहमदाबादला रवाना

दरम्यान, या अपघाताची माहिती मिळताच टाटा समूहाचे अध्यक्ष एन. चंद्रशेखरन एअर इंडिया विमान अपघातानंतर परिस्थितीचा आढावा घेण्यासाठी अहमदाबादला पोहोचले आहेत. एअर इंडिया ही कंपनी टाटा समूहाचा एक भाग आहे आणि या गंभीर अपघाताच्या पार्श्वभूमीवर, चंद्रशेखरन स्वतः परिस्थितीचे निरीक्षण करण्यासाठी आणि आवश्यक सूचना देण्यासाठी घटनास्थळी पोहोचले आहेत.

हे ही वाचा>> Ahmedabad Air India Crash: अपघात झालेल्या विमानातील संपूर्ण प्रवाशांची यादी जशीच्या तशी...

लष्कर आणि हवाई दलाने घटनास्थळी 40 हून अधिक रुग्णवाहिका तैनात केल्या आहेत, ज्या जखमींना त्वरित वैद्यकीय मदत पुरवण्यात गुंतल्या आहेत. याशिवाय, दोन लष्करी रुग्णालये पूर्णपणे बचावकार्यात गुंतली आहेत, जिथे सर्व डॉक्टर आणि वैद्यकीय कर्मचारी सतत सेवा देत आहेत. 

अहमदाबाद विमानतळ पुन्हा सुरू करण्यात आले आहे

अपघातानंतर चार तासांनी अहमदाबाद विमानतळ हे पुन्हा एकदा सुरू करण्यात आले आहे. विमान अपघातानंतर, खबरदारी म्हणून काही काळ उड्डाणे थांबवण्यात आली होती, परंतु आता धावपट्टी आणि इतर तांत्रिक व्यवस्था तपासल्यानंतर विमानतळ पुन्हा सुरू करण्यात आले आहे. अधिकाऱ्यांनी सांगितले की, प्रवासी सुविधा आणि उड्डाण सेवा सामान्यपणे सुरू आहेत आणि सर्व सुरक्षा मानकांचे पालन केले जात आहे.

अहमदाबादमधील या ठिकाणी झाला विमान अपघात

अपघात स्थळाचे (Meghani Nagar, अहमदाबाद विमानतळाजवळ) Google मॅप लोकेशन येथे आहे. जिथे एअर इंडिया AI 171 क्रॅश झाले. अहमदाबादमधील सरदार वल्लभभाई पटेल आंतरराष्ट्रीय विमानतळाच्या ( Sardar Vallabhbhai Patel) धावपट्टी 23 वरून उड्डाण केल्यानंतर काही वेळातच भारतीय प्रमाण वेळेनुसार दुपारी 1:38 PM IST (08:08 UTC) ही घटना घडली आणि विमान मेघानी नगर निवासी भागात कोसळले.