बीड : मोबाईल अन् दारुसाठी पैशांचा वाद, नातवाने आजोबाला संपवलं; अन् नैसर्गिक मृत्यूचा बनाव रचला

मिलिंद नगर येथे वास्तव्यास असलेले रामभाऊ गायकवाड यांचा मृत्यू झाल्यानंतर त्यांच्या मृत्यूची नोंद प्रथम आकस्मित म्हणून करण्यात आली होती. मात्र मृत्यूच्या परिस्थितीबाबत काही संशयास्पद बाबी आढळून आल्याने संभाजीनगर पोलीस ठाण्याच्या अधिकाऱ्यांनी सखोल चौकशी सुरू केली. तपासादरम्यान मृत्यू नैसर्गिक नसून मारहाणीमुळे झाल्याचे निष्पन्न झाले.

या प्रकरणात मृत रामभाऊ गायकवाड यांच्या पत्नी द्रौपदीबाई गायकवाड यांनी पोलिसांत फिर्याद दाखल केली. त्यांच्या फिर्यादीनुसार नातू शुभम बाळू गायकवाड (वय 27, रा. मिलिंद नगर, परळी) हा दारू पिण्यासाठी आणि मोबाईलसाठी वारंवार पैशांची मागणी करत होता. संबंधित दिवशीही त्याने पैशांची मागणी केली होती. मात्र पैसे देण्यास नकार दिल्याने आरोपीने आजोबांशी वाद घातला.

हेही वाचा : आधी महिलेवर लैंगिक अत्याचार... नंतर, तिच्यासह पती अन् 2 वर्षांच्या मुलाची निर्दयी हत्या! तिहेरी हत्याकांडाने खळबळ

वादाचे रूपांतर पुढे हिंसाचारात झाले. आरोपी शुभम गायकवाड याने रामभाऊ गायकवाड यांना लाथाबुक्क्यांनी बेदम मारहाण केल्याचे चौकशीत समोर आले. या मारहाणीत रामभाऊ गायकवाड यांना गंभीर दुखापत झाली. उपचार मिळण्यापूर्वीच त्यांचा मृत्यू झाला.

घटनेनंतर आरोपीने पोलिसांची दिशाभूल करण्याचा प्रयत्न करत गुंगारा देण्याचा प्रयत्न केला. मात्र संभाजीनगर पोलीस ठाण्याच्या अधिकाऱ्यांनी तपासाची चक्रे फिरवत सखोल चौकशी केली असता आरोपीचा गुन्हा उघडकीस आला. पोलिसांनी आरोपीला ताब्यात घेतल्यानंतर संपूर्ण प्रकार स्पष्ट झाला.

या प्रकरणी संभाजीनगर पोलीस ठाण्यात गुन्हा रजिस्टर क्रमांक 17/2026 अन्वये भारतीय न्याय संहितेच्या कलम 103 (1) अंतर्गत खुनाचा गुन्हा दाखल करण्यात आला आहे. आरोपी शुभम बाळू गायकवाड सध्या पोलिसांच्या ताब्यात असून पुढील तपास सुरू आहे. या खुनप्रकरणाचा पुढील तपास पोलीस उपनिरीक्षक अनिल शिंदे हे करत असून, संपूर्ण घटनेचा तपशीलवार तपास करण्यात येत आहे. नातेसंबंधाला काळिमा फासणाऱ्या या घटनेमुळे परळी शहरात एकच खळबळ उडाली आहे.

इतर महत्त्वाच्या बातम्या 

अल्पवयीन तरुणांचा 6 वर्षीय मुलीवर सामूहिक बलात्कार... आरोपीच्या आईने स्वतःच्या मुलासोबत पाहा केलं तरी काय