चंद्रपूर : शाळेत जाण्यासाठी आनंदाने तयार होऊ लागला, अन् ह्रदयविकाराचा झटका आला, 10 वर्षीय मुलाचा मृत्यू

आनंदाने शाळेसाठी तयार होत असतानाच कोसळला काळ

मिळालेल्या माहितीनुसार, ईशान हा आज सकाळी नेहमीप्रमाणे उत्साहाने शाळेत जाण्यासाठी उठला होता. त्याने आपली आंघोळ आटोपली आणि तो शाळेचा गणवेश परिधान करून पूर्णपणे तयार होत होता. मात्र, सकाळी 7 वाजेच्या सुमारास नियतीला काही वेगळेच मान्य होते. गणवेश घालत असतानाच अचानक त्याला हृदयविकाराचा तीव्र झटका आला आणि तो जागीच कोसळला. आपल्या पोटच्या गोळ्याची ही अवस्था पाहून आई-वडिलांच्या पायाखालची जमीन सरकली. त्यांनी क्षणाचाही विलंब न लावता बेशुद्ध पडलेल्या ईशानला तातडीने उपचारांसाठी जवळच्या रुग्णालयात हलवले. मात्र, हॉस्पिटलमध्ये पोहोचल्यानंतर काही वेळातच त्याची प्राणज्योत मालवली आणि डॉक्टरांनी त्याला मृत घोषित केले.

कमी वयातील हृदयविकाराने सर्वच अवाक; कुटुंबावर दुःखाचा डोंगर

ईशानचा मृत्यू हृदयविकाराच्या झटक्याने झाल्याचे स्पष्ट होताच आत्राम कुटुंबावर दु:खाचा डोंगर कोसळलाय. ज्या मुलाला काही वेळापूर्वी शाळेसाठी तयार होताना पाहिले, त्याचा मृतदेह पाहण्याची वेळ आल्याने आई-वडिलांनी केलेला आक्रोश हृदय पिळवटून टाकणारा होता. अवघ्या 10 वर्षांच्या मुलाला इतक्या तीव्र स्वरूपाचा हृदयविकाराचा झटका कसा येऊ शकतो, या विचाराने वैद्यकीय क्षेत्र आणि नागरिक अवाक झाले आहेत. या घटनेमुळे शाळेतील त्याचे शिक्षक आणि मित्र-मैत्रिणींमध्येही शोकाकुल वातावरण असून, एका अभ्यासू आणि खेळकर विद्यार्थ्याला गमावल्याची भावना व्यक्त होत आहे.

इतर महत्त्वाच्या बातम्या 

शेजाऱ्याने चिमुकलीसमोर तिच्या आई-बापाला संपवलं, गळा चिरुन क्रूरपणे हत्या; नेमकं कारण काय?