जालना : वाळू माफियाकडून मंडळ अधिकाऱ्याच्या अंगावर ट्रॅक्टर घालण्याचा प्रयत्न; घटनेचा व्हिडीओ व्हायरल

मिळालेल्या माहितीनुसार, अंबड तालुक्यातील सुकना नदी पात्रातून अवैधरित्या वाळू उपसा सुरू असल्याची माहिती महसूल विभागाला मिळाली होती. त्यानुसार महसूल पथकातील मंडळ अधिकारी कडोस यांच्यासह कर्मचाऱ्यांनी घटनास्थळी जाऊन कारवाई सुरू केली. यावेळी एका ट्रॅक्टरमधून बेकायदेशीररीत्या वाळूची वाहतूक होत असल्याचे पथकाच्या निदर्शनास आले.

महसूल अधिकाऱ्यांनी संबंधित ट्रॅक्टर चालकाला वाहन थांबवण्याचा इशारा दिला. मात्र, कारवाईपासून बचाव करण्याच्या उद्देशाने ट्रॅक्टर चालकाने वाहन न थांबवता थेट समोर उभ्या असलेल्या महिला मंडळ अधिकारी कडोस यांच्या अंगावर ट्रॅक्टर घालण्याचा प्रयत्न केला. सुदैवाने प्रसंगावधान राखत अधिकारी बाजूला झाल्याने मोठी दुर्घटना टळली.

हेही वाचा : बीड : 'अरे पळू नको..', नटून-थटून आलेला नवरदेव भर मंडपातून पळून गेला; नेमकं काय घडलं? पाहा VIDEO

ही संपूर्ण घटना घटनास्थळी उपस्थित असलेल्या व्यक्तीने मोबाईल कॅमेऱ्यात चित्रित केली असून, संबंधित व्हिडीओ सध्या सोशल मीडियावर मोठ्या प्रमाणात व्हायरल होत आहे. व्हिडीओमध्ये ट्रॅक्टर चालकाची बेजबाबदार व दहशत निर्माण करणारी कृती स्पष्टपणे दिसून येत आहे. या घटनेमुळे जिल्ह्यातील अवैध वाळू माफियांची मुजोरी पुन्हा एकदा चव्हाट्यावर आली आहे.

दरम्यान, महसूल विभागाच्या अधिकाऱ्यांवर थेट जीवघेणा हल्ला करण्याचा प्रयत्न झाल्याने प्रशासन आणि पोलिस यंत्रणेवरही दबाव वाढला आहे. या प्रकरणी संबंधित ट्रॅक्टर चालक आणि वाळू माफियांवर कठोर कारवाई करण्यात यावी, अशी मागणी नागरिकांमधून होत आहे. तसेच अवैध वाळू वाहतुकीवर कारवाई करणाऱ्या अधिकाऱ्यांच्या सुरक्षेचा प्रश्नही ऐरणीवर आला आहे.

या घटनेनंतर प्रशासन नेमकी काय भूमिका घेणार, दोषींवर कोणती कारवाई केली जाणार आणि अवैध वाळू वाहतुकीला आळा घालण्यासाठी कोणती ठोस पावले उचलली जाणार, याकडे संपूर्ण जिल्ह्याचे लक्ष लागले आहे.

इतर महत्त्वाच्या बातम्या 

पुणे: "आय मिस यू दिव्यांशी..." फेसबूक लाइव्ह करत तरुणाने संपवलं जीवन! 'त्या' कारणामुळे उचललं टोकाचं पाऊल