दोन कानाखाली देऊ का?

महापौर रितू तावडे यांनी 'एक्स' या सोशल मीडिया प्लॅटफॉर्मवर तीन जुलै रोजी एक व्हिडिओ पोस्ट केला आहे. हा व्हिडिओ मुंबईतील कॉटन ग्रीन परिसरातील असल्याचं त्यांनी या पोस्टमध्ये म्हटलंय. या व्हिडिओत एक मॅनहोल उघडं असल्याचं दिसून येत आहे. तसेच काही कामगार तिथं काम करत आहेत. या व्हिडिओत महापौर आधी हिंदीतून आणि नंतर मराठीतून बोलत असून त्या एका व्यक्तीवर संतापल्याचं दिसतं. तावडे संतापून त्याला म्हणतात की, 'क्या खिंचू कान के नीचे दो? इधर से लोग जा रहे है भाग-भाग के, मोबाइल पे है. वापिस कोई गिरा तो?' (दोन कानाखाली देऊ का? इथून लोक धावत-पळत जात आहेत. पुन्हा कोण पडलं तर?') ती व्यक्ती नेमकी कोण आहे? तो मजूर आहे का? हे त्या व्हिडिओतून नीट कळून येत नाही.

हे ही वाचा : Mumbai Monsoon : मुंबईत पावसाची धुव्वादार बॅटिंग, चार दिवसांत तिघांचा दुर्दैवी मृत्यू

'बॅरिकेड्स आण, लगेच'

यापुढं त्या मराठीतून बोलतात. त्या म्हणतात की, 'काल माणूस एक मेला. बॅरिकेड्स आण, लगेच.' यानंतर त्या कुणाशी तरी फोनवर बोलत आहेत. फोनवर त्या म्हणत आहेत की, '...दोन वर्कर्स काम करत आहेत. ना इथे बॅरिकेड्स आहेत, ना कायेय? तुम्ही बघताय ना काय परिस्थिती आहे?...प्लीज, असं करु नका हो साहेब.' असा आशय असणारा हा व्हिडिओ त्यांनी पोस्ट केला आहे. या सगळ्या व्हिडिओत बॅकग्राऊंडला 'रक्तचरित' हे गाणं वाजत राहतं.

हे ही वाचा : मुंबईत मुसळधार पाऊस, पश्चिम रेल्वेकडून महत्त्वाची अपडेट जारी

मुंबईकरांची सुरक्षा हीच आमची प्राथमिकता!

एका बाजूला कानाखाली मारण्याची भाषा आणि दुसरीकडे फोनवर बोलताना साहेब असं म्हणून त्यांनी वापरलेली मवाळ भाषा यावरुन वाद निर्माण होण्याची शक्यता आहे.

दरम्यान, या पोस्टमध्ये रितू तावडेंनी लिहिलं आहे की, 'मुसळधार पावसात MbPT च्या हद्दीत विना-बॅरिकेड्स उघड्या मॅनहोलचे काम सुरू असल्याचे निदर्शनास आले. नागरिकांच्या सुरक्षेसाठी अतिरिक्त पंप आणि तातडीच्या उपाययोजनांची गरज आहे. स्थानिक प्रशासन आणि MbPT मध्ये चांगल्या ताळमेळासाठी मी लवकरच एक समन्वय बैठक आयोजित करत आहे. मुंबईकरांची सुरक्षा हीच आमची प्राथमिकता!'