पंकजा मुंडे यांचे पीए अनंत गर्जेंच्या पत्नीची आत्महत्या, दु:खद घटनेनंतर पंकजा ताईंचा बीड दौरा रद्द

बीड : भाजप नेत्या आणि मंत्री पंकजा मुंडे यांच्या स्वीय सहाय्यक अनंत गर्जे यांच्या पत्नीने आत्महत्या केल्याची धक्कादायक माहिती समोर आली आहे. डॉक्टर गौरी पालवे आणि अनंत गर्जे यांचा नुकताच, म्हणजे ७ फेब्रुवारी रोजी विवाह झाला होता. मात्र, वरळीतील निवासस्थानी त्यांनी गळफास घेऊन जीवन संपवल्याची घटना घडली. ही घटना काल संध्याकाळी सुमारे सातच्या सुमारास उघडकीस आली. घरातील कौटुंबिक कलहातून हा प्रकार घडल्याची प्राथमिक माहिती पोलिसांकडून मिळत आहे. वरळी पोलिसांनी याप्रकरणी अपमृत्यूची नोंद केली असून अधिक तपास सुरू आहे.

गौरी पालवे या वरळी बीडीडी येथे राहात होत्या आणि केईएम रुग्णालयाच्या डेटिस विभागात डॉक्टर म्हणून कार्यरत होत्या. आत्महत्येनंतर त्यांचा मृतदेह पोस्टमार्टमसाठी केईएम रुग्णालयात पाठवण्यात आला आहे.

हेही वाचा : पैठण : बापाचा खून करुन मृतदेह घरात पुरला,भोळसर आईला धमकी देऊन गप्प केलं, 8 दिवसांनी उग्र वास अन्..

पंकजा मुंडे यांचा बीड दौरा रद्द 

त्यामुळे राज्याच्या मंत्री पंकजा मुंडे यांनी आजचा बीड जिल्हा दौरा स्थगित केला आहे. त्यांचे स्वीय सहाय्यक (पीए) अनंत गर्जे यांच्या पत्नीने आत्महत्या केल्याची धक्कादायक माहिती समोर आल्यानंतर त्यांनी जिल्ह्यातील सर्व नियोजित कार्यक्रम रद्द केले. नगर परिषदेच्या आगामी निवडणुकांच्या पार्श्वभूमीवर पंकजा मुंडे आज बीडमध्ये विविध महत्त्वपूर्ण बैठका घेण्यासाठी येणार होत्या. निवडणूक रणनीती आणि संघटनात्मक चर्चांसाठी त्यांच्या अनेक बैठका निश्चित झाल्या होत्या. मात्र, पीए अनंत गर्जे यांच्या पत्नीच्या मृत्यूची घटना उघड होताच पंकजा मुंडे यांनी तात्काळ दौरा रद्द करण्याचा निर्णय घेतला.

अनंत गर्जे हे पंकजा मुंडे यांच्या दीर्घकाळापासून वैयक्तिक सहाय्यक म्हणून कार्यरत आहेत. मुंबईतील कामकाजापासून बीडमधील कार्यक्रमांपर्यंत सर्व जबाबदाऱ्या ते नियमितपणे सांभाळत होते. मंत्री मुंडे यांच्या राजकीय आणि प्रशासकीय कार्यात गर्जे यांची महत्त्वपूर्ण भूमिका असल्याने या घटनेचा त्यांच्यावर मोठा भावनिक परिणाम झाल्याचे सांगितले जाते. या दुर्दैवी प्रकारामुळे बीडमधील राजकीय वर्तुळातही हळहळ व्यक्त केली जात आहे.

इतर महत्त्वाच्या बातम्या 

अंबरनाथः उड्डाणपुलावर झालेल्या ‘त्या’ भयंकर अपघातातून शिवसेना उमेदवार थोडक्यात बचावल्या, ड्रायव्हरला अटॅक आला अन्…