'370 रुपयांची बिर्याणी'.. अन् प्रणित मोरेचा तर बाजारच उठला!

नेमका हा वाद काय आहे? प्रणित मोरेने असे काय केले की त्याच्यावर इतकी टीका होत आहे? आणि या संपूर्ण प्रकरणावर त्याने आपल्या माफीनाम्यात काय म्हटले आहे? हे समजून घेऊया.

370 रुपयांच्या बिर्याणीचा वाद

प्रणित मोरेच्या एका लाईव्ह स्टँड-अप शोदरम्यान प्रेक्षकांमध्ये बसलेल्या हिमांशू जांगरा नावाच्या तरुणाने डेटिंगशी संबंधित एक वादग्रस्त अनुभव सांगितला. त्याने दावा केला की त्याने एका तरुणीला 370 रुपयांची चिकन बिर्याणी खाऊ घातली होती आणि आता तो तो खर्च तिच्याकडून वसूल करू इच्छितो.

या वक्तव्यावर प्रणित मोरेने हसत प्रतिक्रिया दिली आणि तो प्रसंग स्टेजवरून अधिक ठळकपणे मांडला. ही क्लिप सोशल मीडियावर व्हायरल होताच महिलांचा सन्मान, संमती आणि स्त्रियांकडे पाहण्याच्या दृष्टिकोनावरून देशभरात मोठा वाद निर्माण झाला.

या प्रकरणानंतर अश्लील टिप्पणी करणारा हिमांशू जांगरा ज्या गुरुग्रामस्थित कंपनीत कार्यरत होता, त्या कंपनीने त्याच्यावर कारवाई करत त्याची सेवा समाप्त केल्याची माहिती समोर आली.

डॉक्टर सेजल पवारचा व्हिडिओ आणि नवा वाद

पहिला वाद अद्याप शांत झाला नव्हता, तोच प्रणित मोरेच्या शोमधील आणखी एक व्हिडिओ सोशल मीडियावर व्हायरल झाला. या व्हिडिओमध्ये वैद्यकीय शिक्षण घेणारी डॉक्टर सेजल पवार दिसत होती.

तिने वैद्यकीय शिक्षणादरम्यान मृतदेहांचे विच्छेदन करताना आलेल्या अनुभवांबाबत बोलताना पुरुष मृतदेहांच्या गुप्तांगांबाबत काही आक्षेपार्ह आणि मर्यादेबाहेरील टिप्पणी केली. या वक्तव्यांमुळे वैद्यकीय क्षेत्रासह सर्वसामान्य नागरिकांमध्येही संतापाची लाट उसळली.

सोशल मीडियावर अनेकांनी प्रश्न उपस्थित केला की, अशा प्रकारची चर्चा सुरू असताना प्रणित मोरेने हस्तक्षेप करून ती थांबवायला हवी होती. उलट त्याने त्या चर्चेला वाव दिल्याचा आरोप त्याच्यावर करण्यात आला.

सोशल मीडियावर टीकेचा भडिमार

या दोन्ही व्हिडिओंनंतर प्रणित मोरेला मोठ्या प्रमाणात ट्रोल करण्यात आले. टीकाकारांचे म्हणणे आहे की, अश्लील किंवा आक्षेपार्ह विधानांवर हसून प्रतिक्रिया देणे किंवा त्यांना प्रोत्साहन मिळेल अशा पद्धतीने सादर करणे चुकीचे आहे.

काहींनी असा आरोपही केला की, शोमध्ये सभ्यतेच्या मर्यादा पाळल्या जात नाहीत आणि वेळेवर हस्तक्षेप केला असता तर हे दोन्ही वाद टाळता आले असते.

प्रणित मोरेची जाहीर माफी

वाढता विरोध आणि टीका पाहता प्रणित मोरेने अखेर सोशल मीडियावर पोस्ट करत जाहीर माफी मागितली. त्याने आपल्या इन्स्टाग्राम अकाउंटवर लिहिले की, संबंधित चर्चा हाताळताना त्याच्याकडून चुका झाल्या आणि तो हा विषय अधिक जबाबदारीने हाताळू शकला असता.

या घटनेतून आपण महत्त्वाचा धडा घेत असल्याचे त्याने नमूद केले. यासोबतच काही काळासाठी त्याने आपले इन्स्टाग्राम अकाउंट डी-अॅक्टिव्हेट केल्याचीही माहिती समोर आली.

वादामुळे अडचणीत प्रणित मोरे

370 रुपयांच्या बिर्याणीपासून सुरू झालेला हा वाद आता डॉक्टर सेजल पवारच्या वक्तव्यांपर्यंत पोहोचला आहे. सोशल मीडियावरील संताप, ट्रोलिंग, जाहीर माफी आणि अकाउंट डी-अॅक्टिव्हेशन या सर्व घडामोडींमुळे प्रणित मोरे सध्या मोठ्या दबावाखाली असल्याचे दिसत आहे.

या वादाचा परिणाम त्याच्या सार्वजनिक प्रतिमेवर झाल्याचे मानले जात आहे. काही कार्यक्रमांवरही परिणाम झाल्याची चर्चा आहे. त्यामुळे सध्या तरी प्रणित मोरेसाठी ही "370 रुपयांची बिर्याणी" खरोखरच खूप महागात पडल्याचे चित्र दिसत आहे.