महिला शिवसैनिक नगरसेवक झाल्याच्या आनंदात, पण 5 दिवसांनी घात झाला, अज्ञातांनी केली पतीची हत्या

प्राथमिक माहितीनुसार, मंगेश काळोखे सकाळच्या वेळेत आपल्या मुलाला शाळेत सोडण्यासाठी घरातून बाहेर पडले होते. मुलाला शाळेत पोहोचवून परत येत असताना, आधीच दबा धरून बसलेल्या हल्लेखोरांनी त्यांच्यावर अचानक हल्ला चढवला. काळ्या रंगाच्या चारचाकी वाहनातून आलेल्या तीन ते चार अज्ञात इसमांनी त्यांच्या दुचाकीचा रस्ता अडवला आणि काही सेकंदांतच तीक्ष्ण शस्त्रांनी सपासप वार केले. हल्ला इतका भीषण होता की काळोखे रस्त्यावरच कोसळले आणि रक्ताच्या थारोळ्यात पडले, तर हल्लेखोर घटनास्थळावरून वाहनासह पसार झाले.

या घटनेची बातमी पसरताच परिसरात भीतीचे वातावरण निर्माण झाले. काही क्षणातच घटनास्थळी नागरिकांची गर्दी झाली. नुकत्याच पार पडलेल्या नगरपरिषद निवडणुकीत मानसी काळोखे यांनी विजय मिळवला असल्याने, निवडणूक निकालातून निर्माण झालेला राजकीय वाद, जुने वैर किंवा दबाव यामागे कारणीभूत असण्याची शक्यता पोलिसांकडून तपासली जात आहे. तसेच, ही हत्या सुपारी देऊन घडवून आणली असावी, अशी चर्चा स्थानिक पातळीवर सुरू आहे.

घटनेची माहिती मिळताच उपविभागीय पोलीस अधिकारी, स्थानिक पोलीस आणि गुन्हे अन्वेषण शाखेचे (एलसीबी) पथक तातडीने घटनास्थळी दाखल झाले. मृतदेह ताब्यात घेऊन शवविच्छेदनासाठी शासकीय रुग्णालयात पाठवण्यात आला असून घटनास्थळाचा पंचनामा करण्यात आला आहे. कायदा व सुव्यवस्थेचा प्रश्न निर्माण होऊ नये यासाठी परिसरात मोठ्या प्रमाणावर पोलीस बंदोबस्त तैनात करण्यात आला असून शहरात तणावपूर्ण शांतता आहे.

दरम्यान, आरोपींच्या शोधासाठी रायगड जिल्ह्याच्या सीमेवर नाकाबंदी करण्यात आली आहे. काळ्या रंगाच्या संशयित वाहनाचा शोध सुरू असून परिसरातील तसेच मार्गावरील सीसीटीव्ही फुटेज तपासासाठी ताब्यात घेण्यात आले आहे. वरिष्ठ पोलीस अधिकाऱ्यांनी तपासाला गती देण्यात आली असून दोषींना लवकरच अटक केली जाईल, असा विश्वास व्यक्त केला आहे.

ही हत्या खोपोलीतील नागरिकांसाठी तसेच राजकीय क्षेत्रासाठी धक्कादायक ठरली आहे. नागरिकांमध्ये असुरक्षिततेची भावना निर्माण झाल्याने पोलिसांनी संयम राखण्याचे आणि अफवांवर विश्वास न ठेवण्याचे आवाहन केले आहे. या घटनेमुळे स्थानिक राजकारणासह नागरी सुरक्षेवरही प्रश्न उपस्थित झाले असून, संपूर्ण प्रकरणाचा सखोल आणि निष्पक्ष तपास सुरू असल्याचे पोलिस प्रशासनाने स्पष्ट केले आहे.

इतर महत्त्वाच्या बातम्या 

अकोला हादरलं, पोटच्या मुलीवर बापाचा लैंगिक अत्याचार, काकानेही अब्रू लुटली, नंतर शेजारचा आजोबाही झाला नराधम