सांगलीत चाललंय तरी काय? 15 दिवसात 3 खून, वायरमनसह कोणा-काणाची झाली हत्या?

दारूच्या नशेत चेष्टा-मस्करी ठरली जीवघेणी

भिवरगी-करजगी रोडवरील गौडर वस्ती येथे सोमवारी दुपारी दोनच्या सुमारास ही घटना घडली. महादेव सिद्धू बिरादार (वय 26, व्यवसाय शेती) आणि त्याचा चुलत भाऊ सिलसिद्ध मलाप्पा बिरादार (वय 27) हे दोघे एकत्र असताना त्यांच्यात दारूच्या नशेतून चेष्टा-मस्करी सुरू होती. मात्र, ही मस्करी काही वेळातच गंभीर वादात बदलली. सुरुवातीला शाब्दिक असलेला हा वाद इतका विकोपाला गेला की त्याचे रूपांतर हाणामारीत झाले. दोघांमध्ये जोरदार झटापट सुरू झाली आणि रागाच्या भरात सिलसिद्धने महादेववर हल्ला केला. यावेळी उपस्थितांमध्ये आणि सोशल मीडियावर व्हायरल झालेल्या व्हिडिओमध्ये ही थरारक घटना कैद झाली आहे, ज्यामुळे परिसरात दहशतीचे वातावरण आहे.

 गळा दाबून चुलत भावाचा केला खून

दोघांमध्ये सुरू असलेल्या या मारामारीत सिलसिद्ध बिरादार याने महादेवचा गळा हाताने जोरात दाबून धरला. प्रत्यक्षदर्शी आणि नातेवाईकांनी दिलेल्या माहितीनुसार, दोघे एकमेकांच्या अंगावर बसून मारामारी करत होते, तेव्हा सिलसिद्धने महादेवचा गळा तो हालचाल करेनासा होईपर्यंत सोडला नाही. महादेव बेशुद्ध पडल्याचे लक्षात येताच आजूबाजूच्या लोकांनी धाव घेऊन त्याला तत्काळ जत ग्रामीण रुग्णालयात दाखल केले. मात्र, डॉक्टरांनी तपासणीपूर्वीच त्याला मृत घोषित केले. या घटनेचा व्हिडिओ मोबाईलमध्ये रेकॉर्ड झाल्याने पोलिसांना तपासात मोठा पुरावा मिळाला असून, आरोपीचे नावही निष्पन्न झाले आहे. प्राथमिक तपासात गळा दाबूनच खून झाल्याचा संशय व्यक्त करण्यात आला असून मृतदेह शवविच्छेदनासाठी मिरज शासकीय रुग्णालयात पाठवण्यात आला आहे.

 परिसरात भीतीचे सावट आणि कुटुंबावर कोसळला शोककळा

जत तालुक्यात पंधरा दिवसांच्या अंतराने झालेल्या या तिसऱ्या खुनामुळे कायदा व सुव्यवस्थेचा प्रश्न ऐरणीवर आला आहे. भिवरगीतील या घटनेने परिसरात भीतीचे वातावरण असून पोलीस प्रशासनाकडून कडक पावले उचलण्याची मागणी होत आहे. मृत महादेव बिरादार हा घरातील कर्ता पुरुष होता, त्याच्या निधनाने कुटुंबाचा आधार हरपला आहे. त्याच्या पश्चात गरोदर पत्नी, आई, एक भाऊ आणि विवाहित बहीण असा परिवार असून, ऐन तारुण्यात त्याचा अशा प्रकारे अंत झाल्याने गावावर शोककळा पसरली आहे. उमदी पोलिसांनी आरोपीला बेड्या ठोकल्या असून पोलीस या प्रकरणाचा अधिक तपास करत आहेत.