कल्याण : 6 कोटीच्या गोळ्या, फ्लॅटमधून चालायचं रॅकेट, आश्विनी पॉल कशी झाली ड्रग्जक्वीन?

साकिनाका ते टिटवाळा; असा उघड झाला अंमली पदार्थांचा साठा

या संपूर्ण प्रकरणाचा धागा साकिनाका येथे झालेल्या एका कारवाईशी जोडलेला आहे. पोलिसांनी सुरुवातीला 200 एक्स्टेसी गोळ्यांसह इरफान अन्सारी नावाच्या व्यक्तीला अटक केली होती. त्याच्या चौकशीत सुफियान नावाच्या इसमाचे नाव समोर आले, जो या रॅकेटमधील महत्त्वाचा दुवा होता. तपासाची चक्रे फिरवत असताना पोलिसांना टिटवाळ्यातील ए. पॉल या महिलेची माहिती मिळाली. पोलीस उपायुक्त नवनाथ ढवले यांच्या मार्गदर्शनाखाली पथकाने सलग तीन दिवस तांत्रिक पुरावे गोळा केले. लोकेशन ट्रॅकिंग आणि पाळत ठेवल्यानंतर शनिवारी रात्री टिटवाळ्यातील तिच्या घरावर छापा टाकण्यात आला. पोलिसांना संशय होता की, या महिलेकडे ड्रग्जचा साठा असू शकतो, मात्र घराची झडती घेतल्यावर मोठ्या प्रमाणावर मिळालेला साठा पाहून पोलीस पथकही अवाक झाले.

मर्सिडीज आणि डॉलरचे चिन्ह; आंतरराष्ट्रीय कनेक्शनचा संशय

जप्त करण्यात आलेल्या एक्स्टेसी गोळ्यांची गुणवत्ता आणि त्यांच्यावरील चिन्हे पाहून या प्रकरणाचे गांभीर्य अधिक वाढले आहे. या गोळ्यांवर मर्सिडीज आणि डॉलर यांसारखी चिन्हे कोरलेली आहेत, जी यापूर्वी नेस्को ड्रग्ज पार्टी प्रकरणात सापडलेल्या गोळ्यांवरही आढळली होती. यामुळे या रॅकेटचे थेट आंतरराष्ट्रीय ड्रग्ज सप्लाय नेटवर्कशी संबंध असण्याची शक्यता पोलीस वर्तवत आहेत. आरोपी महिलेला असा विश्वास होता की पोलीस तिच्या आलिशान घरापर्यंत कधीच पोहोचू शकणार नाहीत, म्हणून तिने इतका मोठा साठा घरातच लपवून ठेवला होता. या कारवाईत पोलिसांनी 5 मोबाईल फोन आणि 7 ते 8 सिम कार्डही जप्त केली आहेत. ती महिला ड्रग्ज पुरवठा करण्यासाठी वेगवेगळ्या क्रमांकांचा वापर करत होती, जेणेकरून पोलिसांना तिचा मागोवा घेता येऊ नये.

आरोपीची गुन्हेगारी पार्श्वभूमी आणि पुढील पोलीस कारवाई

अटक करण्यात आलेल्या ए. पॉल या महिलेच्या वैयक्तिक आयुष्याबद्दलही धक्कादायक माहिती समोर आली आहे. तिने दोन लग्न केली असून तिच्या एका पतीचा गुन्हेगारी रेकॉर्ड पोलिसांच्या हाती लागला आहे. डान्स बारमधील कामातून ती ड्रग्ज माफियांच्या संपर्कात आली आणि स्वतःचा स्वतंत्र पुरवठा साखळी तयार केली. सध्या अंमली पदार्थ विरोधी विभाग तिच्या जप्त केलेल्या मोबाईलचा डेटा तपासत असून, या रॅकेटमध्ये अजून किती जणांचा समावेश आहे याचा शोध घेतला जात आहे. येत्या काळात या प्रकरणात आणखी मोठ्या अटक होण्याची शक्यता वर्तवण्यात येत आहे. मुंबई आणि उपनगरांमध्ये ड्रग्जचे जाळे किती खोलवर पसरले आहे, हे या कारवाईतून पुन्हा एकदा स्पष्ट झाले असून पोलीस आता या सिंडिकेटला मुळापासून उपटून काढण्याच्या तयारीत आहेत.

इतर महत्त्वाच्या बातम्या

चंद्रपूर : शाळेत जाण्यासाठी आनंदाने तयार होऊ लागला, अन् ह्रदयविकाराचा झटका आला, 10 वर्षीय मुलाचा मृत्यू