टिटवाळ्यात गणपती विसर्जन मिरवणुकीत तुफान राडा, भाजप-ठाकरे गट आमने-सामने

मिरवणुकीत पुढे जाण्यावरून वाद

मिळालेल्या माहितीनुसार, गणपती विसर्जन मिरवणुकीत पुढे जाण्यावरून दोन्ही गटांमध्ये वाद झाला. या वादात भाजपच्या माजी उपमहापौर तथा विद्यमान नगरसेविका उपेक्षा भोईर, त्यांचे पती शक्तिवान भोईर, ठाकरे गटाचे माजी नगरसेवक सुरेश भोईर आणि पदाधिकारी प्रदीप भोईर यांची नावे समोर आली आहेत. या वादातून दोन्ही गटांमध्ये धक्काबुक्की आणि मारामारी झाल्याचा आरोप आहे.

दोन्ही गटांतील 70 ते 80 जणांविरोधात गुन्हा

या घटनेप्रकरणी कल्याण तालुका पोलिसांनी दोन्ही गटांतील सुमारे 70 ते 80 जणांविरोधात गुन्हा दाखल केला आहे. यामध्ये उपेक्षा भोईर, शक्तिवान भोईर, सुरेश भोईर आणि प्रदीप भोईर यांचाही समावेश असल्याची माहिती आहे.

हे ही वाचा>> गणपती मूर्तीच्या पायाशी अश्लील Video चा QR स्कॅनर, भयंकर कृत्याने मोठी खळबळ

विविध आरोपांखाली गुन्ह्याची नोंद

पोलिसांनी नोंदवलेल्या गुन्ह्यात सार्वजनिक सुव्यवस्थेला बाधा आणणे, दंगल घडवणे, शिवीगाळ, धक्काबुक्की आणि मारहाण यांसह विविध आरोपांचा समावेश आहे. तसेच, ध्वनीक्षेपकासाठी आवश्यक परवानगी न घेता मिरवणूक काढणे आणि जिल्हाधिकाऱ्यांच्या मनाई आदेशाचे उल्लंघन केल्याचाही उल्लेख गुन्ह्यात करण्यात आल्याची माहिती आहे.

हे ही वाचा>> लालबागच्या राजाच्या दर्शन रांगेत जळगावच्या तरुणाचा अंत, कुटुंबीय काय म्हणाले?

स्थानिक राजकीय संघर्षाचीही चर्चा

टिटवाळ्यातील या घटनेकडे स्थानिक राजकीय संघर्षाच्या पार्श्वभूमीवरही पाहिले जात आहे. उपेक्षा भोईर यांच्या पॅनलविरोधात निवडणूक लढवणारे ठाकरे गटाचे प्रदीप भोईर यांचा पराभव झाला होता. त्यानंतर आता गणपती विसर्जन मिरवणुकीदरम्यान दोन्ही गट पुन्हा आमनेसामने आल्याने या घटनेची राजकीय वर्तुळात चर्चा सुरू झाली आहे.

कल्याण तालुका पोलिसांकडून पुढील तपास

या प्रकरणाचा पुढील तपास कल्याण तालुका पोलीस करत आहेत. मिरवणुकीदरम्यान झालेल्या वादाची पार्श्वभूमी, धक्काबुक्की आणि मारहाणीचे आरोप तसेच गुन्ह्यातील संबंधित व्यक्तींची भूमिका याबाबत तपास सुरू आहे.