अल्पवयीन मुलीचं 7 वर्षे सामूहिक लैंगिक शोषण; नोकरीचं आमिष अन्... भाजप खासदाराच्या माजी पीएसह 7 जणांना अटक

आरोपांनुसार, एका निवृत्त सार्वजनिक बांधकाम विभागातील कर्मचारी, व्यापारी आणि भाजप खासदाराच्या माजी पीएने तिचं शोषण केलं. तपास यंत्रणा कॉल डिटेल रेकॉर्ड, सीसीटीव्ही फुटेज, वाहन लॉगबुक आणि रेस्ट हाऊस रजिस्टर तपासत आहेत. दोन दिवसांच्या पोलीस कोठडीनंतर, दोन्ही मुख्य आरोपींना न्यायालयीन कोठडीत पाठवण्यात आलं असून जप्त केलेली वाहने आणि मोबाईल फोन फॉरेन्सिक तपासणीसाठी पाठवण्याची प्रक्रिया सुरू आहे. पोलिसांच्या म्हणण्यानुसार, पुराव्यांच्या आधारे तपास पुढे जाईल आणि कोणत्याही गुन्हेगाराला सोडलं जाणार नाही. 

महिला पोलीस ठाण्यात दाखल केलेल्या तक्रारीनुसार, पीडिता 2018 मध्ये तिच्या आईसोबत दुर्गमध्ये आली होती. तिच्या आईला घरकाम देण्यात आलं होतं आणि राहण्यासाठी निवासस्थाने देखील उपलब्ध करून देण्यात आली होती. या काळात विभागाशी संबंधित काही लोकांनी तिला धमकावून बलात्कार केल्याचा आरोप आहे. नंतर, पीडितेला नोकरीचं आमिष दाखवून विविध ठिकाणी, विशेषतः रेस्ट हाऊसमध्ये नेण्यात आलं. तिच्यावर बऱ्याचदा सामूहिक बलात्कार करण्यात आला आणि तिने विरोध केल्यास बदनामीची धमकी देण्यात आल्याचा पीडितेने आरोप केला. 

हे ही वाचा: असं काय झालं की, कुणाल कामरा थेट सुषमा अंधारेंसोबत विधानभवनात पोहोचला... टीशर्टने वेधलं लक्ष!

एफआयआरनुसार, 2018 ते 2025 दरम्यान दुर्ग, उतई, पाटण आणि कवर्धा यासह विविध ठिकाणी हे गुन्हे घडले. पीडितेचा दावा आहे की आरोपींनी तिला त्यांच्या पदाचा वापर करून धमकावलं आणि तिला गप्प राहण्यास भाग पाडलं. त्यांनी व्हॉट्सअॅपवर फोटो आणि व्हिडिओची मागणी करून ते व्हायरल करण्याची धमकी दिली. पोलीस आता डिजिटल पुरावे तपासत असून कॉल डिटेल विश्लेषण करत असल्याची माहिती आहे. 

हे ही वाचा: मुंबईची खबर: रेल्वे प्रवाशांसाठी गूड न्यूज! 19 फेब्रुवारीपासून 12 एसी लोकलसह 3 नव्या नॉन एसी लोकल सुरू...

13 फेब्रुवारी रोजी न्यायालयात आत्मसमर्पण केल्यानंतर, दोन्ही आरोपींना दोन दिवसांच्या पोलिस कोठडीत ठेवण्यात आलं. चौकशीदरम्यान त्यांनी दिलेल्या  माहितीवरून, CG 07 AU 352 आणि इंडिगो CG 07 AT 7047 या कार जप्त करण्यात आल्या. दोन मोबाईल फोन देखील जप्त करण्यात आले. त्यानंतर, 15 फेब्रुवारी रोजी दोघांची न्यायालयीन कोठडीत मध्यवर्ती कारागृहात रवानगी करण्यात आली. जप्त केलेल्या साहित्याची फॉरेन्सिक तपासणी केली जाईल असे पोलिसांचे म्हणणे आहे. अद्याप एकूण सात आरोपींना अटक करण्यात आल्याची माहिती आहे. पोलिसांच्या म्हणण्यानुसार, इतर इलेक्ट्रॉनिक आणि कागदोपत्री पुरावे देखील गोळा केले जात असून सरकारी मालमत्तेचा कथित गैरवापर कसा झाला? याचाही तपास यंत्रणा करत आहेत.